Qasietti Ramazan aiymen qatar kelgen aitýly mereke I. Jansúgirov atyndaǵy Mádeniet saraiynda ózindik sán-saltanatymen erekshe atalyp ótti. Aq halatty abzal jandardyń júzine erekshe qýanysh uialap, birin-biri merekemen quttyqtap, shat-shadymen kóńil-kúide júr. Qushaqtary gúlge toly. Bul qurmettiń barlyǵy da meditsina qyzmetkerlerine arnaldy. Alǵys arqalaǵan abzal jandar saltanatty jiynǵa oblystyń túkpir-túkpirinen keldi.
Oblystyq densaýlyq saqtaý salasynda 19 myń adam eńbek etedi. Turǵyndarǵa 600-den astam meditsinalyq mekeme sapaly qyzmet kórsetip keledi. Sońǵy 5 jylda densaýlyq saqtaý salasyna bólinetin qarjy kólemi 59 paiyzǵa ósip, 2017 jyly 83,6 mlrd. teńgege jetken. 2017 – 2018 jyldar aralyǵynda 22 meditsinalyq nysan salý josparlanyp otyr.
Óńirdegi barlyq aq halatty abzal jannyń qurmetine arnalǵan saltanatty jiynǵa oblys ákimi Amandyq BATALOV qatysyp, densaýlyq saqtaý qyzmetkerleri men ardagerlerin tól merekesimen quttyqtady. Oblys halqynyń densaýlyǵyn nyǵaitýǵa úlken úles qosyp júrgen dáriger qaýymyn quttyqtaǵan óńir basshysy Elbasynyń densaýlyq saqtaý salasyna airyqsha kóńil bóletindigin aita kele, oblys boiynsha bul baǵytta atqarylyp jatqan ilkimdi isterdi tilge tiek etti.
– Ult Kóshbasshysynyń «Ult densaýlyǵy – bizdiń jarqyn bolashaǵymyzdyń negizi» degen sózi dáriger mamandyǵynyń bar bolmysyn aiqyndap tur. Bul sala memlekettik saiasattyń basym baǵyttarynyń biri. Sondyqtan biz densaýlyq saqtaý salasyna barynsha jaǵdai jasaýǵa tyrysamyz. Ótken jyldyń ózinde qanshama nysan halyq igiligine berildi. Tipti, Taldyqorǵan kópsalaly aýrýhanasyna Prezidentimiz Nursultan Nazarbaevtyń ózi kelip, rizashylyǵyn bildirdi. Emdeý mekemeleriniń materialdyq-tehnikalyq bazasy da nyǵaiyp keledi. 2016 jyly 2,5 mlrd. teńgege 123 meditsinalyq qural-jabdyq alyndy. Jas mamandardy jumysqa tartý jospary da oidaǵydai atqarylýda. Osyndai jetistiktermen ǵana shektelip qalmai, josparlanǵan jumystardy júieli túrde atqarýda birlese jumys isteýimiz kerek, – dedi ákim.
Saltanatty jiynda oblys ákimi bir top meditsina qyzmetkerin úlgili qyzmetteri úshin Qurmet gramotasymen, Alǵys hatpen jáne «Densaýlyq saqtaý isine qosqan úlesi úshin» tósbelgisimen marapattady. Sonymen qatar, «Oblystyń úzdik dárigerlik ambýlatoriiasy» atalymy boiynsha Uiǵyr aýdany Suńqar aýyly dárigerlik ambýlatoriiasynyń meńgerýshisi Aida Ismailova marapattalsa, «Oblystyń úzdik aýyldyq aýrýhanasy» ataǵyn Damir Suraýjanov meńgerip otyrǵan Qarasai aýdanyndaǵy Úshqońyr aýyldyq aýrýhanasy ielendi. «Oblystyń úzdik aýdandyq aýrýhanasy» ataǵy Bolat Balaqoishiev basqaratyn Eńbekshiqazaq aýdanyndaǵy ortalyq aýrýhanasyna, «Oblystyń úzdik oblystyq meditsinalyq mekemesi» ataǵy Sáýle Qusmoldanova basshylyq etetin Taldyqorǵan qalalyq kópsalaly aýrýhanasyna buiyrdy. Al oblystyq úzdik tehnikalyq kásibi bilimi bar meditsinalyq qyzmetkeri nominatsiiasyn Eskeldi aýdandyq ortalyq aýrýhanasynyń direktory Tóleý Sarpekov jeńip aldy. Oblystyń úzdik dárigeri bolyp Ile aýdandyq aýrýhanasynyń hirýrgiia bóliminiń meńgerýshisi Aidyn Elikbaev tanylsa, oblystaǵy úzdik aýyl dárigeri Taldyqorǵan qalasyna qarasty Erkin aýyldyq ambýlatoriiasynyń meńgerýshisi Áskerbek Oralbaev atandy. Bilikti de bilimdi qos maman oblys ákiminiń qolynan «Lada Granta» avtokóliginiń kiltin aldy. Sondai-aq, óńir basshysy úzdik densaýlyq saqtaý mekemelerine qarjylai syilyqtar tapsyrdy.
Meditsina salasynyń ardageri Ómirǵali Kenjebek densaýlyq salasynda myqty mamandardy daiarlap, shetel asyp em almaýdyń joldaryn qarastyrýdy usyndy. Jas maman, qalalyq emhananyń terapevt-dárigeri Dana Altynbaeva áriptesterin merekemen quttyqtap, jastarǵa jasalyp jatqan qoldaý men qamqorlyq úshin alǵysyn bildirdi.
Jyl qusyndai saǵyndyryp keletin merekede Súiinbai atyndaǵy oblystyq filarmoniianyń ónerpazdary da qýanysh ielerine kóterińki kóńil-kúi syilady.
Eńlik KENEBAEVA
