قاسيەتتٸ رامازان ايىمەن قاتار كەلگەن ايتۋلى مەرەكە ٸ. جانسٷگٸروۆ اتىنداعى مەدەنيەت سارايىندا ٶزٸندٸك سەن-سالتاناتىمەن ەرەكشە اتالىپ ٶتتٸ. اق حالاتتى ابزال جانداردىڭ جٷزٸنە ەرەكشە قۋانىش ۇيالاپ, بٸرٸن-بٸرٸ مەرەكەمەن قۇتتىقتاپ, شات-شادىمەن كٶڭٸل-كٷيدە جٷر. قۇشاقتارى گٷلگە تولى. بۇل قۇرمەتتٸڭ بارلىعى دا مەديتسينا قىزمەتكەرلەرٸنە ارنالدى. العىس ارقالاعان ابزال جاندار سالتاناتتى جيىنعا وبلىستىڭ تٷكپٸر-تٷكپٸرٸنەن كەلدٸ.
وبلىستىق دەنساۋلىق ساقتاۋ سالاسىندا 19 مىڭ ادام ەڭبەك ەتەدٸ. تۇرعىندارعا 600-دەن استام مەديتسينالىق مەكەمە ساپالى قىزمەت كٶرسەتٸپ كەلەدٸ. سوڭعى 5 جىلدا دەنساۋلىق ساقتاۋ سالاسىنا بٶلٸنەتٸن قارجى كٶلەمٸ 59 پايىزعا ٶسٸپ, 2017 جىلى 83,6 ملرد. تەڭگەگە جەتكەن. 2017 – 2018 جىلدار ارالىعىندا 22 مەديتسينالىق نىسان سالۋ جوسپارلانىپ وتىر.
ٶڭٸردەگٸ بارلىق اق حالاتتى ابزال جاننىڭ قۇرمەتٸنە ارنالعان سالتاناتتى جيىنعا وبلىس ەكٸمٸ اماندىق باتالوۆ قاتىسىپ, دەنساۋلىق ساقتاۋ قىزمەتكەرلەرٸ مەن ارداگەرلەرٸن تٶل مەرەكەسٸمەن قۇتتىقتادى. وبلىس حالقىنىڭ دەنساۋلىعىن نىعايتۋعا ٷلكەن ٷلەس قوسىپ جٷرگەن دەرٸگەر قاۋىمىن قۇتتىقتاعان ٶڭٸر باسشىسى ەلباسىنىڭ دەنساۋلىق ساقتاۋ سالاسىنا ايرىقشا كٶڭٸل بٶلەتٸندٸگٸن ايتا كەلە, وبلىس بويىنشا بۇل باعىتتا اتقارىلىپ جاتقان ٸلكٸمدٸ ٸستەردٸ تٸلگە تيەك ەتتٸ.
– ۇلت كٶشباسشىسىنىڭ «ۇلت دەنساۋلىعى – بٸزدٸڭ جارقىن بولاشاعىمىزدىڭ نەگٸزٸ» دەگەن سٶزٸ دەرٸگەر ماماندىعىنىڭ بار بولمىسىن ايقىنداپ تۇر. بۇل سالا مەملەكەتتٸك ساياساتتىڭ باسىم باعىتتارىنىڭ بٸرٸ. سوندىقتان بٸز دەنساۋلىق ساقتاۋ سالاسىنا بارىنشا جاعداي جاساۋعا تىرىسامىز. ٶتكەن جىلدىڭ ٶزٸندە قانشاما نىسان حالىق يگٸلٸگٸنە بەرٸلدٸ. تٸپتٸ, تالدىقورعان كٶپسالالى اۋرۋحاناسىنا پرەزيدەنتٸمٸز نۇرسۇلتان نازارباەۆتىڭ ٶزٸ كەلٸپ, ريزاشىلىعىن بٸلدٸردٸ. ەمدەۋ مەكەمەلەرٸنٸڭ ماتەريالدىق-تەحنيكالىق بازاسى دا نىعايىپ كەلەدٸ. 2016 جىلى 2,5 ملرد. تەڭگەگە 123 مەديتسينالىق قۇرال-جابدىق الىندى. جاس مامانداردى جۇمىسقا تارتۋ جوسپارى دا ويداعىداي اتقارىلۋدا. وسىنداي جەتٸستٸكتەرمەن عانا شەكتەلٸپ قالماي, جوسپارلانعان جۇمىستاردى جٷيەلٸ تٷردە اتقارۋدا بٸرلەسە جۇمىس ٸستەۋٸمٸز كەرەك, – دەدٸ ەكٸم.
سالتاناتتى جيىندا وبلىس ەكٸمٸ بٸر توپ مەديتسينا قىزمەتكەرٸن ٷلگٸلٸ قىزمەتتەرٸ ٷشٸن قۇرمەت گراموتاسىمەن, العىس حاتپەن جەنە «دەنساۋلىق ساقتاۋ ٸسٸنە قوسقان ٷلەسٸ ٷشٸن» تٶسبەلگٸسٸمەن ماراپاتتادى. سونىمەن قاتار, «وبلىستىڭ ٷزدٸك دەرٸگەرلٸك امبۋلاتوريياسى» اتالىمى بويىنشا ۇيعىر اۋدانى سۇڭقار اۋىلى دەرٸگەرلٸك امبۋلاتوريياسىنىڭ مەڭگەرۋشٸسٸ ايدا يسمايلوۆا ماراپاتتالسا, «وبلىستىڭ ٷزدٸك اۋىلدىق اۋرۋحاناسى» اتاعىن دامير سۇراۋجانوۆ مەڭگەرٸپ وتىرعان قاراساي اۋدانىنداعى ٷشقوڭىر اۋىلدىق اۋرۋحاناسى يەلەندٸ. «وبلىستىڭ ٷزدٸك اۋداندىق اۋرۋحاناسى» اتاعى بولات بالاقويشيەۆ باسقاراتىن ەڭبەكشٸقازاق اۋدانىنداعى ورتالىق اۋرۋحاناسىنا, «وبلىستىڭ ٷزدٸك وبلىستىق مەديتسينالىق مەكەمەسٸ» اتاعى سەۋلە قۇسمولدانوۆا باسشىلىق ەتەتٸن تالدىقورعان قالالىق كٶپسالالى اۋرۋحاناسىنا بۇيىردى. ال وبلىستىق ٷزدٸك تەحنيكالىق كەسٸبي بٸلٸمٸ بار مەديتسينالىق قىزمەتكەرٸ نوميناتسيياسىن ەسكەلدٸ اۋداندىق ورتالىق اۋرۋحاناسىنىڭ ديرەكتورى تٶلەۋ سارپەكوۆ جەڭٸپ الدى. وبلىستىڭ ٷزدٸك دەرٸگەرٸ بولىپ ٸلە اۋداندىق اۋرۋحاناسىنىڭ حيرۋرگييا بٶلٸمٸنٸڭ مەڭگەرۋشٸسٸ ايدىن ەلٸكباەۆ تانىلسا, وبلىستاعى ٷزدٸك اۋىل دەرٸگەرٸ تالدىقورعان قالاسىنا قاراستى ەركٸن اۋىلدىق امبۋلاتوريياسىنىڭ مەڭگەرۋشٸسٸ ەسكەربەك ورالباەۆ اتاندى. بٸلٸكتٸ دە بٸلٸمدٸ قوس مامان وبلىس ەكٸمٸنٸڭ قولىنان «لادا گرانتا» اۆتوكٶلٸگٸنٸڭ كٸلتٸن الدى. سونداي-اق, ٶڭٸر باسشىسى ٷزدٸك دەنساۋلىق ساقتاۋ مەكەمەلەرٸنە قارجىلاي سىيلىقتار تاپسىردى.
مەديتسينا سالاسىنىڭ ارداگەرٸ ٶمٸرعالي كەنجەبەك دەنساۋلىق سالاسىندا مىقتى مامانداردى دايارلاپ, شەتەل اسىپ ەم الماۋدىڭ جولدارىن قاراستىرۋدى ۇسىندى. جاس مامان, قالالىق ەمحانانىڭ تەراپەۆت-دەرٸگەرٸ دانا التىنباەۆا ەرٸپتەستەرٸن مەرەكەمەن قۇتتىقتاپ, جاستارعا جاسالىپ جاتقان قولداۋ مەن قامقورلىق ٷشٸن العىسىن بٸلدٸردٸ.
جىل قۇسىنداي ساعىندىرىپ كەلەتٸن مەرەكەدە سٷيٸنباي اتىنداعى وبلىستىق فيلارمونييانىڭ ٶنەرپازدارى دا قۋانىش يەلەرٸنە كٶتەرٸڭكٸ كٶڭٸل-كٷي سىيلادى.
ەڭلٸك كەنەباەۆا
