Táńirden basqa suramai, ul suraǵan urpaqjandy jurtpyz ǵoi. Jasynda erinimiz tushyp súigenimizdiń, eseigende el qatarynan kórgenimizdiń ózine máz bolamyz. Al endi kópten ozyp kósh bastap, jurtty toqtatyp, sóz bastap jatatyn súleilerimizdiń jolynda qurban bolyp ketýge peiilmiz. Árbir tushymdy isin, tutymdy sózin estigen saiyn tóbemiz kókke bir-aq eli jetpei qalyp otyrady. "Qudaidan azamatty nege suraidy deisiń!” – dep qaralai ainalyp-tolǵanyp bitemiz.
Jaratqan Ie de joraly jurtymyzdyń osy bir peiilin udaiy elep-eskerip kele jatqandai. Sarań taǵdyr men sarabdal tarih qandai ótkeleginiń tusynda da az bolǵanymen bar ekenine, dara bolǵanymen nar ekenine kúnine myń shúkirlik aitqyzatyndai alǵadai azamattardan qur alaqan qaldyryp kórmepti.
Qazirgi qazaq qaýymynyń tap sondai mańdaiyna ustap, zamanymyzǵa tap kelgen dýlyǵaly narymyzǵa balap, qoǵadai japyryla qoshemet kórsetip júrgen biregei tulǵasy – Sher-aǵań, kádimgi Sherhan Murtaza ekendigi daýsyz.
Qudaiǵa shúkir, ol mynaý tirshilik dep atalatyn ný jyqpyldy jetpis jyl boiy sharshamai kezip, talai órde ókpesi óship, talai eńiste ókshesi qanap, talai jerde qaýip pen qaterge janap, janyn shúberekke túiip ótse de, taisalmastan alǵa tartyp, qadamy qaiyrly, qanjyǵasy maily, jolbarystyń jotasyn opyrǵan batyrdai eki murty edireiip, jelke tusy kúdireiip, taltań basyp ortamyzda júr.
Táńir onyń kózine otty, kókiregine shoqty, qoramsaǵyna oqty mol salyp jaratypty. Tek atyn estigenniń ózinde et-júregiń shymyrlap, sai-súiegiń syrqyrap qoia beretindei.
Uldaryna bulai dep at qoiyp júrgen qaýym shalǵyny, qysta aiyrttan qary men aiýdai aqyrǵan aiazy ántek mol bolatyn Jýaly men Myńbulaqtyń jon arqasyna qonjiǵan azǵantai aýyl Quli Shilmenbet arasyna eki dúrkin at basyn burǵanym bar. Sóitsem, ol da kádimgi qara borbai qazekemniń irgesi qońyrsyǵan qarapaiym aýyly eken. Malmen qosa jerdi kúittep, kóbirek beinet keship óskendikterinen shyǵar, adamdary óńkei qaiyń qaptal, qapsaǵai, myǵym sińir, shymyr et, qaiys, taramys, syptyǵyr, kúnes qara tory bolyp keledi eken. Omyraýlarynan saqaly tógilgen, kómeilerinen maqaly tógilgen tyǵyryq taqiia syrbaz taqýa qariialary bolady eken. Kesteli kimeshekti bastyra Talastyń Alataýyndaǵy qarly shyńdardai qaqyra jaýlyq oraǵan aq kókirek ájeileri bolady eken. Emirene amandasyp, tebirene tildesedi eken. Mizam shýaqtai maisa kúlip, maida sóileitin meiirban el eken. Baǵzy Irannyń dúldúl aqyndary jarysa jyrlaǵan Tarazdyń tal shybyqtai iilgen tana kóz qyzdary men arshyn jigitteriniń de tuqymy aýyp kete qoimaǵan eken. Bar eken. Uiala kúlip, imene izet qylady eken. Qulaǵyn tikireitken itteri bolmasa, adamynan kekireiip ne tymyraiyp turǵan eshkimdi kórmedim. Eshqaisysynyń órekpip turǵan eshteńesin baiqamadym.
Shamasy, budan jetpis jyl buryn ótken shildehanada ainalany ashtyq jaipap, tirshilik nýyn burshaq uryp, jan bitken japyryla kúirep, aspan alaqandai, jer tebingidei qýyrylyp jatqan qý zamanda dúniege kelgen qyzyl shaqa nárestege álgindei áýpirim esimdi tastary órge domalap tasyp júrgendikten emes, taýlary jyǵylyp jasyp júrgendikten qoiǵan siiaqty. Bir aýyldyń nemese bir rýly eldiń ǵana emes, búkil uiytqyly ulttyń basyna qyryq qyrsyqtyń qara bulty qatar tónip, qaradai kúder úzilip otyrǵan tusta arttaǵy urpaq shetinen arshylan, shetinen sheri bolyp óspese, endigi eldiń esi túgendelip, etegi jabyla qoiýy ekitalai ekendigin erte eskergendikten qoisa kerek.
Qalai bolsa da, qai aqsaqal aitsa da, azan shaqyrylǵanda aýyzyna osyndai arýaq shamyryqtyrar arlan esim túsken jaryqtyqtyń jatqan jeri jánnat bolǵai!
Ásilinde, Sher-aǵań es bilip, etek japqaly sol bir sirek esimge laiyq bolýdy jadynan bir shyǵaryp kórmegendei. Qalyńnyń túkpirindegi túgi tikireigen qabylandai qaharly minez tanytyp, qaisar taǵdyr keship keledi. Kózin ashpai jatyp, ákesi Sibir aidaldy. Besikten beli shyqpai jatyp, ishtegi apatqa syrttaǵy alapat ulasty. Qabyrǵasy qatpai jatyp, joqtyq, jetimdik, tipti qorlyq pen zorlyq kórdi. Judyryǵy barlar jelkeden nuqydy. Saýsaǵy barlar kózine shuqydy. Kókiregindegi zardy baiqatpai, kózindegi jasty kórsetpei, qasarysa júrip qairat, alysa júrip aqyl jiyp ósti. Aýyzdyǵa azýyn, tyrnaqtyǵa tisin, qiianatqa kúshin kórsete júrip erjetti. Kóringen bir túrtip baqqan “halyq jaýynyń” balasynan kópshiliktiń kóńili qulap, halyqtyń ózi qalap súigen danasyna deiin qiyn-qystaý jol keshti. Talai tesken taýdan ótip, talai shyrqaý shyńǵa shyqty.
Ol túsken eńis qandai tuńǵiyq bolsa, ol jetken jeńis sondai tym biik.
Ol bárimizdiń qolymyzdan kele bermeitin isterdi tyndyrdy. Bárimiz táýekel ete bermeitin isterge táýekel etti. Sondyqtan da bárimiz jete bermeitin abyroiǵa jetti.
Ol búgin “Arshylanym-ai!” – dep ardaq tutsań da, “Sherim-ai!” – dep mardamsysań da, “Qabylanym-ai!” – dep qaimyqsań da, aýyzyń qisaiyp ketpeitin ulttyq rýhaniiatymyzdyń asa aibyndy tulǵasy. Kesek sýretker. Kemel qairatker. Asqaq azamat.
Dáiim, jeldiń ótinde, jaýdyń betinde, ushar shyńdy jailap, ushan dalany qystap, kúndiz aiqaidan, túnde “aitaqtan” aýyzdary bosamai, irgeden jaý, tóbeden jut tónip, astyndaǵy aty ylǵi aýyzdyǵyn shainap, ústindegi óziniń ylǵi yza-namysy qainap, tisin qairap, bes qarýyn belinen bir túsirmei ótetin birbetkei bezerimdi noiandardan basqany adamǵa sanamai, alys-julysta, aitys-tartysta, aiqas-saiysta ǵumyr keshken jaýjúrek qaýym qaster tutatyn bar minez, bar qasiettiń bárine ie bul adam ádebietke de, saiasatqa da sol qalyń kóptiń arasynan, olar shegip baqqan qiiamet-qaiym qiyndyqtardyń ortasynan keldi. Sodan da shyǵar, onyń jazǵany da, aitqany da, tipti qalyń jiynda tóńiregindegilerdi edireie tyńdap, ejireie sóileitini de entelegen kóptiń kóńilin dóp basyp otyrady. Qai tarapqa, qai aýyl, qai qaýymǵa barsa da, ony ortasynan oiyp alyp, oqshaý qoshemettep jatady. Jalpynyń arasynda júrýge qimaityn jalǵyzyndai alabóten aimalap baǵady.
Bul halyqqa da jarasady. Halqy asty-ústine túsip jatqan arysqa da jarasady.
Óitkeni, Sherhan qabyrǵasy qatyp, býyny bekigeli halyqtan bir eli irge ajyramai keledi. Qolyna qalam alǵaly halyqtyń sózin sóilep keledi. Qatardaǵy tilshi kezinde halyq bitirip jatqan eren istermen qosa, halyq kórip otyrǵan eresen taýqymetterdi de jasyrmai jaza bildi.
Qalamymen birge qanaty da qataiyp, aqparat tórine shyqqanda da sol ustanymynan bir sát ainyp kórgen emes. Ainalasyna halyq sýsap otyrǵan áńgimeni aita alatyndar men olardyń aýyzyna qaqpaq bolmaityndardy jinady. Alpysynshy jyldarǵy azǵantai jylymyqtyń tusynda siresken toń jibip, astynan qaýlai kóterilgen álsiz kókti qaitadan aiaz jalap, sýyq úrip ketpeýine qolynan kelgenniń bárin jasady. Ultsyzdyq pen uiatsyzdyq birdei meńdep “qazaqy mal mal emes, qazaqy bala bala emes” deitin qaǵida memlekettik saiasatqa ainalǵan tusta ulttyń tili kesilmeýi, halyqtyń rýhy óshpeýi, arttaǵy urpaqtyń aljasyp ketpeýi jolynda arystandai arpalysyp, jolbarystai jaǵalasa alǵan jalǵyz redaktor Sherhan Murtaza bolǵandyǵyn óz kózimizben kórgenbiz. Bárin joǵaltyp, bárin tonatyp, bárinen aiyrylǵan adyra qaýymymyzdyń oń jaǵynda ata-babadan qalǵan jalǵyz kóz kóne ábdiredei tól ádebietimizden aiyrylyp qalmaý úshin jas talapkerlerimizdiń qalamynan shyqqan jiligi tatityn ár sóilem, ár shýmaqty jerden jeti qoian tapqandai “Leninshil jastyń” betine súireledik. Kún saiyn gazet betin bermeitin N.S.Hrýshevtiń qulash-qulash baiandamalary men sóilegen sózderimen jarystyryp, ol kezde áli bir kitaby da shyqpaǵan Muqaǵali, Qadyr, Jumekenderdiń qulash-qulash jyrlary men dastandary basyldy. Sahnada bir-eki sátti ról oinaǵan jas akterlerimiz ben bir-eki shyǵarmasy kórmege qoiylǵan jas sýretshilerimiz jaiynda etektei-etektei maqalalar jariialandy. Túkpir-túkpirdegi talaǵynyń biti bar jastarǵa ádeii izdeý salyndy. Saryaǵash pen Atyraýdaǵy muǵalimder Tólegen men Fariza, Qatynqaraǵai men Lengirdegi traktorshylar Oralhan men Muhtarlar ádebiet tabaldyryǵynan solai attady. Buryn bosaǵadan oryn timeitin “Leninshil jas” endi ulttyq rýhaniiatymyzdyń tórdegi sharainasyna ainaldy. Qazirgi qazaq ádebieti men óneriniń óresin asyryp, órisin keńeitip júrgen óren júirikterdiń báriniń derlik tusaýy “Leninshil jasta” kesildi. Qanattary “Jalynda” qataiyp, “Juldyzdyń” betinde qabyrǵaly shyǵarmalary jariialandy. “Qazaq ádebieti” men “Egemendi Qazaqstan” betinde ádil baǵalaryn alyp, esimderi elge tanyldy. Báriniń de rýhani ákesi basqa eshkim emes, Sherhan Murtaza boldy. Onyń jazýshylyq pen jýrnalshylyqtaǵy, qoǵamdyq oi-sanadaǵy mundai “ókil balalary” júzdep emes, myńdap sanalady. Óitkeni, ol basqarǵan tusta, qai basylym da el arasyn áldeneshe júz myńdap tarap júrdi. Ol qandai aqparat quralyn basqarsa da, qazaqtyń muń-múddesine degende kózi kireýke, qulaǵy tosań, tili shúljiń tartyp kórgen joq. Qazaqtyń alpysynshy jyldardan bastap ózgere bastaǵan qoǵamdyq minez-qulqynyń jaqsylyq pen jańalyqqa qarai bet burýyna redaktor Sherhan Murtazanyń sińirgen eńbegi orasan zor. Qazaqtyń aqyl-oiy men áreket-amalyn Jeltoqsanǵa qarai jeteleýde ol basqarǵan ádebi basylymdardyń, táýelsizdikke qarai jeteleýde ol basqarǵan “Egemen Qazaqstannyń” eleýli qyzmet etkendigin aitpai ketý aqiqattyń ala jibin attaǵandyq bolar edi.
Ony ádebietke de alyp kelip júrgen osyndai eljandylyǵy dep oilaimyn. Jasyratyn nesi bar, jýrnalistikada shyn sardarlyǵyn kórsetken altyn basty azamatymyz kenet áńgime-povester jariialata bastaǵanda qolda turǵanda qarmap qalaiyq dep romanistikaǵa birden aýysqan ózge de redaktorlarymyz ben baspa direktorlary siiaqty ádebietke kóptiń biri bolyp qalyp, qadirin joǵaltyp almas pa eken dep qaýiptengenderdiń bireýi biz edik. Kóp uzamai ol kúdikten arylyp, keibir shyǵarmalary shyqqanda yqylastana oqyǵanbyz. Sońǵy ailarda 1994 jyly shyqqan tórt tomdyǵy men “Ai men Aishadan” bastap keiingi kezde jaryq kórgen shyǵarmalaryn qaitadan súzip shyqqanda, áýelgi kúdigimizdiń ábestik ekendigine kózimiz ábden jetti.
Ol ádebietke de halyqtyń qabyrǵasyna ne batyp otyrǵandyǵyn anyq bilgendikten kelipti. Onyń aqparat quraldaryna qaraǵanda ómirlik shyndyqty jan-jaqty qamtýǵa, qansha degenmen, amal-ailasy kóbirek ekendigin sezgesin kelipti. Sol kezeńde kúlli álemdik ádebiette de álgi sebepten týyndaǵan ‘jýrnalizm” aǵymy bas kóteripti. Naqty derektemelik ádebiet pen belletristikanyń stildik simbiozy kórkem oilaýdyń ikemdiligin odan ármen arttyra túsipti. Sherhan Murtaza da jazýshylyqqa ómirden kórip bilgen óz taqyryby bolǵandyqtan kelipti. Ol az deseńiz, ózinen basqa eshkim aityp jetkize almaityn ózindik taǵdyr-talaiy bolǵandyqtan kelipti. Onyń tuńǵiyǵyna tek ádebiet qana boilap, onyń tylsym syrlary tek sýretker ǵana saraptai alatynyn túsingendikten kelipti.
Biraq, aqiqatqa júginsek, Sherhan Murtazanyń mundai mol ómirlik qory men sýretkerlik sheberligi áp degennen ai qushaq qaýyp qabysa qalmapty. Onyń búgingi daýsyz moiyndalyp otyrǵan úlken talanty ádebiet aidynynda birden asqar taýdai aibyn tanytyp, asqaqtap shyǵa kelmepti. Áýeli muhit túbinen endi kóterilip kele jatqan aisbergtei ár jer, ár jerden shoqtyq kórsetip, birte-birte órkeshtenip, birtindep biiktei túsipti. Onyń mundai birtindep kemeldenýine eki senimdi soavtory myqtap kómektesipti. Jazýshy Sherhan Murtazanyń bir soavtory – shyryldaǵan shyndyq. Ekinshi soavtory – shyjǵyryla shyrqyraǵan ar-namys. Onyń basty taqyryby – tabanǵa taptalǵan ar-namystyń oianýy, apshýy, aiqasqa shyǵýy.
Basqalaryn bylai qoiǵanda, bastapqy shyǵarmalarynyń ózinde osy pafos Shaqpaqtyń jeli kótergen qiyrshyq tastardai betińe uryp, kózińdi osqylaidy. Kórip júrgen “dáýrenińe” yzańdy keltiredi. Basymyzdan ótken surapyldar men sumdyqtar jaiynda oiǵa batyrady. It silikpemen júrip, qańqasynyń qaida qalǵany belgisiz qairan ákelerimizdiń, jesirlikten jerkúiik bop kete jazdaǵan ainalaiyn analarymyzdyń, jetimdikten kózkúiik bolyp ósken ózderimizdiń, jaýyr túiedei jutańdyqtan bir aryla almai ótken aýylymyz ben ajdahanyń aýyzynda kún keshken qaýqarsyz qaýymymyzdyń qan qaqsatar shyndyǵyn qaz-qalpynda kóz aldymyzǵa ákeledi. Myltyqty maidan ótkenmen, myltyqsyz maidannyń eshqashan bitpeitinin uǵyndyryp, kóringen kókimege bir sengen áleýmettik esalańdyqtan esińdi jiǵyzady. Ótkenge degen ókinish pen keleshekke degen úmitti talshyq etken jansebil tirshiliktiń qai tyrtyǵynyń da qasterli ekendigine qapysyz qanyqtyrady. Óz kókiregińdegi yza men namystan, jiger men senimnen, arman men maqsattan basqa kókte de, jerde de eshqandai tirek-taianysh joq ekendigine kózińdi jetkizedi. Oǵan dáiek pen aiǵaqty ózi keshken keleńsiz taǵdyrdan tabady. Barshamyz bastan ótkerip kelgen kúldi-kómesh kúiki tirliktiń basqamyz ańǵara bermegen ashy aqiqattaryn ańǵartady.
Kúnde kórip júrgen qarapaiym jandardyń álginiń bárine aqyryna deiin shydap baqqan qaisarlyǵyn jyrlai otyryp, qajymas qairatkerlik pen qaharmandyq taqyrybyna boilaidy. Turar Rysqulov týraly bes kitaptan turatyn soqtaly epopeia solai dúniege kelipti. Dáiim qapy ketip kelgen ákege ul bolý men dáiim qapy soǵyp qala beretin halyqqa kósem bolýdyń ashysy mol, tushysy tapshy taqsiretti taǵdyrynyń taǵylymy dál búgingi bizderge kerek. Sherhannyń Turary batyldyǵy men batyrlyǵy jaǵynan baǵzydaǵy babalarymyzdan, kúiinishti shyrǵalań taǵdyry men kúiikti shytyrman oilary jaǵynan armandary ishinde, barmaqtary tisinde ketip, kóz aldymyzda kúirep joǵala bergen kúni keshegi aǵalarymyzǵa, tipti kóp jaǵdaida alasapyran zamanda almaǵaiyp hal keship kele jatqan búgingi ózderimizge aýmai uqsaidy. Armanyna zamany, aqylyna qoǵamy der kezinde qulaq aspai, dáiim kijinýmen ótken pushaiman tulǵalardyń tusaýly taǵdyryn Sherhan Murtaza óz kózimen kóre júrip, óz basynan ótkere júrip beinelegendei. Jalqyń túsingen aqiqatqa jalpyń des berip, jappai umtylys týmaǵan jerde qai qaýymnyń baǵy janǵan?! Halqynyń baǵy janbaǵan jerde qai jalqynyń ilgeri basqan qadamy ker ketpegen?! Turardyń keshkeni de tap sol ker taǵdyr edi. Onyń janyn jegidei jep bitken de tek kóptiń ápergen jeńisin qanjyǵasyna bir ózi bókterip, ózgeniń bárine óktemsip baqqan Stalinniń zulymdyǵy da, baqtalastarynyń baqaidan qaqqan zalymdyǵy da emes edi. Imandai sengen aqiqatynyń aldamshy, ańsap jetken armanynyń aqqaptal tarihtyń kezekti bir qyljaǵy, jai ánsheiin jalǵanshylyq bolyp shyqqandyǵy edi. Báriniń de máńginiń qiialy ekendigin moiyndaýdyń aýyrlyǵy edi. Ol bul jolǵa bir basynyń baǵyn oilap túspep edi, esesi ketip, eńsesi jyǵylyp kelgen elin oilap túsip edi. Saýabyn alam ba dep júrgende, obalyna qalǵanyna kúiine kúizeldi.
Odan beri de tarih talai tóńbekshidi. Úmitsiz saitan dep, ár jańa urpaq jańa úmitpen týdy. Dúnie bul qalpynda qalmaidy, áiteýir bir ózgeredi, ózgerse, jaqsylyqqa qarai ózgeredi degen senimdi qazir jer ortasyna kelip otyrǵan estiiar býyn da talshyq etti. Taǵdyr, rasynda da, olardyń mańdaiyna kezekti tarihi tańdaý jasaýdy ózderi bastan keshýge jazypty. Bul joly da keteshek qoǵam keleshek qoǵamnyń aiaǵynan aiamai shalyp baqty. Ondaida halqyna shyndap jany ashityndardyń qol qýsyryp qarap otyra almaityndyǵy túsinikti. Qai-qaisysy da hal-qaderinshe qairat etip baqty. Bul tusta da Sherhan erekshe kózge tústi. Atyshýly Turar týraly hamsasynyń siiasy keppei jatyp, “qaita qurylý” nemese “qaita qyrylý” ekendigi áli neǵaibil, áiteýir “qaita qurý” dep atalatyn túsiniksiz kezeńde “Stalinge hat” “Beseýdiń haty” syndy ulttyq sanamyzdy aita qalarlyqtai shaiqalta bilgen shamyryqty tragediialardy dúniege ákeldi. Halyqtyq bolmysymyzdy qaita qaýsatyp ketýi yqtimal jańa rýhani keselderimizdi áshkereleitin “Jalǵyz úilik zilzala”, “Esek saýdasy” atty tragikomediialyq týyndylar men áńgime-novellalar jazdy.
Bunyń bári taýqymetten kózi ashylyp kórmegen kemtalai halqymyzdyń aýyspaly kezeń dep atalatyn aýsar tusta taǵy da sazǵa otyryp qalmaýyna qarlyǵashtyń qanatymen sý sepkenindei qalamgerlik janashyrlyǵy edi.
Sherhan Murtaza – álgindei ulttyq taǵdyrymyz túbegeili sheshiler kezeńde bunyń bári azdyq etetinin eldiń eń aldymen sezingen qalamgerimiz. Shyn aitys pen shyn tartysqa beldi bekem býyp shyqpai bolmaitynyn qapysyz alǵanda bóri etekten degendei, qai ózgeristerdiń tusynda da yssylai suǵynyp baǵatyn saiasi solaqailar men ekonomikalyq qomaǵailar bul joly da tóbe kórsetpei qalǵan joq. Onyń bári endi-endi tirsegin tiktep kele jatqan eldigimizdiń sońyna sóz eritkizip, tái-tái táýelsizdigimizdi tálkekteýshiliktiń órtine mai quiyp baǵary túsinikti. Mundaida óz aiylymyzdy ózimiz jiyp, óz ábestigimizdi ózimiz tyiyp saqtanbasaq, bizdi syrttan turyp jaqtap ne aqtap alatyndar tabyla bermeidi. Osyǵan shaqyratyn pátýaly sóz, parasatty pikir keregip turǵanda da, aldymen Sherhan Murtaza táýekel etti. Ejelgi qalamdasy Kamal Smaiylovqa hat jazyp, kóptiń ózegin órtep júrgen kúiikti máseleler tóńireginde pikir tartty. Olardyń ózara almasqan bul hattary biz úshin de ońaiǵa túspegen ótpeli kezeńimizdiń qalai ótkendigine rýhani aiǵaq bolyp qalary sózsiz.
Ýaiymdy úmit jeńip kele jatqan qazirgidei tusta barlardy qanaǵatqa, joqtardy sabyrǵa, jalpy áleýmetti yjdahatty eńbekpen túsingen ziialy azamatymyz. Áýeli ol basqarǵan “Egemen Qazaqstannyń” betinde bastalǵan kózqarastar saiysy jańa sailanǵan Joǵarǵy Keńestiń májilisterinde jalǵasty. Ol – rasynda da, kimniń kim ekendigin aiqyndaǵan ailar men jyldar boldy. Egemendigimiz ben táýelsizdigimizdiń taǵdyry da sol bir keskilese oi sharpysqan, pikir saiysqan keskekti kezeńde sheshildi. Sol bir saiasi salǵylastarda aldaspandai jarqyldaǵan saiypqyran sheshenderdiń biri Sherhan Murtaza boldy.
Táýelsizdikke qol jetip, egemen el bolǵan soń da saiasat maidany saiabyrsyǵan emes. Keshegi qapy qalǵandar endi balań táýelsizdik pen balaýsa memlekettiń ár adymyn ańdyp, ár jańsaq qadamyn inege shanshyp baqty. Ketken qatelikteri men joia almai kele jatqan kemshinderin jipke tizip otyratyn kirpiiaz synampazdar kóbeidi. Olar syrttan aitylǵan sybyr men sybysty qaǵyp alyp, ishten dúrkirete, dúrildete jónelýge tyrysty. Oǵan aýyspaly kezeńniń, bolmai qoimaityn áttegenailary men aǵattyqtary da az jeleý bolǵan joq. Onyń ústine, jaý jaǵadan yntymaqty tirlikke shaqyryp qana kóp qyrsyqty azaityp, az berekeni kóbeite alamyz.
Jalpy, eldikke endi qoly jetip, eńsesin endi tiktei bastaǵan qaýymdardyń bailyq pen bilik jolyndaǵy taitalastardan boilaryn aýlaq ustap, bereke-birlikke jumylǵany durys ekendigin tarlan tarih talai ret dáleldegen. Bul úshin de aýyzy dýaly azamattar kerek. Biz ondai azamattar joqtyqtan emes, solardyń arasyndaǵy shoqtyǵy bolǵandyǵynan da Sherhan Murtazanyń arǵy-bergidegi eńbegi men aq-adal ómir joly týraly oiymyzdy aǵymyzdan jaryla ortaǵa salǵandy jón kórdik.
Sher-aǵanyń ózi: “Alpys – tal tús” – dep jii aitatyn. Tal tústen keiin sary besin kelmeýshi me edi. Endeshe, jetpis jerdiń túbi emes, sol aitqan sary besin. Alys joldaǵy jolaýshynyń az-maz at shaldyryp alyp, qaitadan atqa qonatyn kezekti aialdamasy.
Jolyńyz uzaq, saparyńyz sátti bolǵai, ardaqty aǵa!
Ábish Kekilbaev
