Foto: Abai oblysy ákimdigi
Abai oblysyndaǵy Abaidyń 180 jyldyǵyna arnalǵan onkúndik mereitoilyq sharalar legi aqynnyń týǵan jeri – Abai aýdanynda túiindeldi, dep habarlaidy Ult.kz.
Keshe Qaraýyltóbede ulttyq sporttyń birneshe túrinen saiystar uiymdastyryldy. "Jeti qazyna" festivali aiasynda jorǵa jarysy, sondai-aq top báige (16 shaqyrym) men alaman báige (25) ótti. Qazaq kúresinen «Túie palýan» (90 keliden joǵary) men «Ógiz palýan» (74 kelige deiin) anyqtaldy.
Júldeli oryndarǵa ie bolǵan sportshylarǵa oblystyń demeýshileri atynan jalpy sany 90 bas jylqy men 10 avtokólik syilyq retinde berildi.
Erekshe atap óterligi, uly Abaidyń jaqsy kórgen oiyny toǵyzqumalaq saiysy men 180 shaqyrymdyq ýltramarafonǵa elimiz boiynsha tuńǵysh ret avtokólik syiǵa tartyldy. Semei men Qaraýyl arasyn 19 saǵat, 9 minýtta júgirip ótken Baýbek Iliasov (Batys Qazaqstan oblysy) jarys jeńimpazy atandy. Toǵyzqumalaq saiysynda shymkenttik Ǵalymjan Temirbaev birinshi oryndy ielendi. "Túie balýan" saiysynda mańǵystaýlyq Nurdáýlet Jarylǵapov, «Ógiz palýan» saiysynda almatylyq Jiger Erkinuly qarsylas shaq keltirmedi. "Top báigede" Almaty oblysynyń, "Alaman báigede" Pavlodar qalasynyń, jorǵa jarysynda Qyrǵyzstannyń júirigi top jardy. Júldegerlerdiń barlyǵy kólikti boldy. "Jeti qazyna" festivaliniń jeńimpazdary júldege jylqy aldy.
Oblys ákimi Berik Ýáli jorǵa, top báige, alaman báige, toǵyzqumalaq, ýltramarafon, qazaqsha kúres jarystarynyń jeńimpazdaryn marapattaý saltanatyna qatysty.
Aimaq basshysy mereitoilyq onkúndik aiasynda toi toilaýǵa emes, oi oilaýǵa, rýhani, ziiatkerlik, tanymdyq, sporttyq sharalarǵa basa mán berilgenin aitty.
"Jalpy, 10 kúndik is-shara eldiń bereke-birliginiń arqasynda joǵary deńgeide ótti dep esepteimin. "Abai akademiiasy" atty entsiklopediialyq portal ashyldy. Birneshe kitaptyń tusaýy kesildi. Myńnan astam komanda qatysqan "Abai kýiz" intellektýaldyq oiyny ótkizildi. Zaǵip jandar men nashar kóretin azamattarǵa arnalǵan kitaphana iske qosyldy. Búgin ózderińiz kórgendei, júlde qorlarynyń ár aimaqqa, tipti qyrǵyz eline deiin ketkeni qýantady. Osy rette toidyń joǵary deńgeide ótýine atsalysqan oblystyń janashyr azamattaryna alǵys aitamyn", - dedi aimaq basshysy.
On kúnge sozylǵan hákim toiy Qaraýyltóbede “Jelsiz túnde jaryq ai" gala-kontsertimen túiindeldi.
Foto: Abai oblysy ákimdigi
