Tanymal ánshi Jazira Baiyrbekovanyń sińlisi Nazira Baiyrbek jezdesi Janbolat Erbatyrovty týǵan kúnimen quttyqtap, onyń kópshilik bile bermeitin qyryn ázilmen jetkizdi. Ol áleýmettik jelidegi jazbasynda jezdesiniń qamqorlyǵy men otbasylyq qarym-qatynasy týraly qyzyqty estelikterimen bólisti, dep habarlaidy ult.kz.
Naziranyń aitýynsha, Janbolat Erbatyrov jaqyndaryna únemi paidaly keńes berip, olardyń josparlaryna qyzyǵýshylyq tanytyp otyrady. Ásirese jaz mezgilinde jezdesiniń WhatsApp pen Instagram arqyly jibergen habarlamalary onyń esinde erekshe saqtalypty.
Ánshiniń baldyzy sol kezde úiin jóndep, aǵash úiler salýdy josparlap júrgenin aitady. Jezdesi oǵan Almaty mańyndaǵy jer telimderi, qurylys materialdary men úidiń syrtqy árleý jumystaryna qatysty túrli aqparat joldaǵan. Alaida keiin jibergen málimetteriniń taqyryby kútpegen jerden ózgergen.
"Úige jóndeý jasap, úlken maqsatpen aǵash úiler saldyryp jatqan edim ǵoi. Qurylys materialyn jibergenińiz jón endi. Biraq nege aiaq jaǵy ferma, mal sharýashylyǵy jaily bolyp ketti, a? Meni malshy qylyp jibereiin dep pe edińiz?" – dep ázildedi Nazira.
Ol Janbolat Erbatyrovtyń baldyzdaryna týǵan aǵasyndai qaraitynyn, olardyń ár bastamasyna qoldaý bildirip, aqyl-keńesin aiamaitynyn atap ótti.
"Jezdem jalpy baldyzdarymen paidaly aqparat bólisip turǵandy jaqsy kóredi. Oilanyp, aqyl-keńes qosyp otyrady", – dedi ol.
Sonymen qatar Nazira ápkesi Jazira Baiyrbekova men Janbolat Erbatyrovtyń otbasylyq ómirine qatysty da qyzyqty oqiǵany eske aldy.
Onyń sózinshe, Amerikada júrgen kezinde jezdesine habarlasyp, ápkesine kóbirek kóńil bólip, romantikalyq kezdesýler uiymdastyrýǵa keńes bergen.
"Buryn Amerikada júrgende jezdeme zvondap, "jezde, Jazira ápkemdi svidaniege shaqyryp, romantikalyq keshter uiymdastyryp turyńyz" dep sybyrlap qoiǵam. Endi bilmeimin, elge kórsetpei jasap júrgen shyǵar romantika. Erli-zaiyptylardyń arasynda romantika úzilmegeni durys qoi", – dep jazdy Nazira Baiyrbek.
Jazba sońynda ol Janbolat Erbatyrovtyń jaqyndaryna janashyr, otbasyna qamqor azamat ekenin aityp, júrekjardy tilegin arnady.
"Aǵasyndai qamqor, ápkesin aialaǵan jaqsy jezdesi bar biz baqyttymyz ǵoi. Bar armanyńyz oryndalsyn! Shańyraqtaryńyz tek qýanyshqa tolsyn, Janbolat jezde", – dep túiindedi ol.
Janbolat Erbatyrov kim?
Janbolat Erbatyrov – qazaq estradasynyń tanymal ánshisi, "Janbolat pen Jazira" dýetiniń múshesi. Ol 1973 jyly Qyzylorda oblysynyń Aral qalasynda dúniege kelgen. Bolashaq ánshi toǵyz balaly otbasynda ósip, jastaiynan ónerge qyzyǵýshylyq tanytqan. Janbolat Erbatyrov Almatydaǵy estrada-tsirk ýchilishesinde bilim alyp júrgen kezinde bolashaq jary Jazira Baiyrbekovamen tanysqan. Keiin ekeýi otbasyn quryp, shyǵarmashylyq joldaryn birge jalǵastyrdy.
Janbolat Erbatyrov pen Jazira Baiyrbekova 2002 jyldan bastap sahnada dýet retinde óner kórsete bastady. Olardyń repertýarynda mahabbat, otbasy, adaldyq jáne adamgershilik taqyryptaryna arnalǵan ánder erekshe oryn alady. Ónerli jup Almatyǵa alǵash qonys aýdarǵan jyldary qarjylyq qiyndyqtarǵa tap bolyp, túrli jumystar atqarǵan. Keiin ánshilik ónerge den qoiyp, birlesken shyǵarmashylyq jobalary arqyly kópshilikke tanyldy. Búginde Janbolat Erbatyrov jubaiymen birge qazaq estradasynda uzaq jyldar boiy óner kórsetip kele jatqan tanymal ánshilerdiń biri sanalady.
Jazira Baiyrbekova kim?
Jazira Sailaýqyzy Baiyrbekova – qazaq estradasynyń tanymal ánshisi, "Janbolat pen Jazira" dýetiniń múshesi. Ol 1978 jyly 30 qyrkúiekte burynǵy Ońtústik Qazaqstan oblysynyń Bógen aýdanyna qarasty Paqtashy eldi mekeninde dúniege kelgen. Ánshi toǵyz balaly otbasynda ósip, bala kezinen mýzykaǵa erekshe qyzyǵýshylyq tanytqan. Mektep qabyrǵasynda dombyra úiirmesine qatysyp, aýdandyq jáne oblystyq óner baiqaýlarynda baq synaǵan. 1992 jyly nebári 14 jasynda "Tamasha" oiyn-saýyq baǵdarlamasyna qatysyp, halyq áni "Sáýlem-ai" arqyly teledidar kórermenderine tanyla bastady. Keiin ápkesi Lázzat Baiyrbekovamen birge sahnaǵa shyǵyp, mýzykalyq ónerin damytty.
Jazira Baiyrbekova Almatydaǵy estrada-tsirk kolledjinde jáne Qazaq memlekettik qyzdar pedagogikalyq ýniversitetinde bilim alǵan. Stýdenttik jyldarynda bolashaq jary Janbolat Erbatyrovpen tanysyp, keiin ekeýi otbasyn qurdy. Ónerli jup birlesip án aityp, qazaq estradasyndaǵy tanymal dýetterdiń birine ainaldy. Ánshiniń "Armansyz kúnim bolmaidy", "Qyz baqyty", "Arman-aý, arman" sekildi ánderi tyńdarman arasynda keńinen taralǵan. Jazira Baiyrbekova jeke shyǵarmashylyǵynda mahabbat, otbasy, saǵynysh jáne ulttyq qundylyqtar taqyrybyna erekshe kóńil bóledi. Ol kontserttik baǵdarlamalarmen qatar túrli mádeni is-sharalar men shyǵarmashylyq jobalarǵa qatysyp keledi. Ánshi áleýmettik jelilerde de belsendi bolyp, óneri men ómirindegi jańalyqtardy oqyrmandarymen bólisip otyrady.
