فوتو: اباي وبلىسى ەكٸمدٸگٸ
اباي وبلىسىنداعى ابايدىڭ 180 جىلدىعىنا ارنالعان ونكٷندٸك مەرەيتويلىق شارالار لەگٸ اقىننىڭ تۋعان جەرٸ – اباي اۋدانىندا تٷيٸندەلدٸ, دەپ حابارلايدى Ult.kz.
كەشە قاراۋىلتٶبەدە ۇلتتىق سپورتتىڭ بٸرنەشە تٷرٸنەن سايىستار ۇيىمداستىرىلدى. "جەتٸ قازىنا" فەستيۆالٸ اياسىندا جورعا جارىسى, سونداي-اق توپ بەيگە (16 شاقىرىم) مەن الامان بەيگە (25) ٶتتٸ. قازاق كٷرەسٸنەن «تٷيە پالۋان» (90 كەلٸدەن جوعارى) مەن «ٶگٸز پالۋان» (74 كەلٸگە دەيٸن) انىقتالدى.
جٷلدەلٸ ورىندارعا يە بولعان سپورتشىلارعا وبلىستىڭ دەمەۋشٸلەرٸ اتىنان جالپى سانى 90 باس جىلقى مەن 10 اۆتوكٶلٸك سىيلىق رەتٸندە بەرٸلدٸ.
ەرەكشە اتاپ ٶتەرلٸگٸ, ۇلى ابايدىڭ جاقسى كٶرگەن ويىنى توعىزقۇمالاق سايىسى مەن 180 شاقىرىمدىق ۋلترامارافونعا ەلٸمٸز بويىنشا تۇڭعىش رەت اۆتوكٶلٸك سىيعا تارتىلدى. سەمەي مەن قاراۋىل اراسىن 19 ساعات, 9 مينۋتتا جٷگٸرٸپ ٶتكەن باۋبەك يلياسوۆ (باتىس قازاقستان وبلىسى) جارىس جەڭٸمپازى اتاندى. توعىزقۇمالاق سايىسىندا شىمكەنتتٸك عالىمجان تەمٸرباەۆ بٸرٸنشٸ ورىندى يەلەندٸ. "تٷيە بالۋان" سايىسىندا ماڭعىستاۋلىق نۇردەۋلەت جارىلعاپوۆ, «ٶگٸز پالۋان» سايىسىندا الماتىلىق جٸگەر ەركٸنۇلى قارسىلاس شاق كەلتٸرمەدٸ. "توپ بەيگەدە" الماتى وبلىسىنىڭ, "الامان بەيگەدە" پاۆلودار قالاسىنىڭ, جورعا جارىسىندا قىرعىزستاننىڭ جٷيرٸگٸ توپ جاردى. جٷلدەگەرلەردٸڭ بارلىعى كٶلٸكتٸ بولدى. "جەتٸ قازىنا" فەستيۆالٸنٸڭ جەڭٸمپازدارى جٷلدەگە جىلقى الدى.
وبلىس ەكٸمٸ بەرٸك ۋەلي جورعا, توپ بەيگە, الامان بەيگە, توعىزقۇمالاق, ۋلترامارافون, قازاقشا كٷرەس جارىستارىنىڭ جەڭٸمپازدارىن ماراپاتتاۋ سالتاناتىنا قاتىستى.
ايماق باسشىسى مەرەيتويلىق ونكٷندٸك اياسىندا توي تويلاۋعا ەمەس, وي ويلاۋعا, رۋحاني, زيياتكەرلٸك, تانىمدىق, سپورتتىق شارالارعا باسا مەن بەرٸلگەنٸن ايتتى.
"جالپى, 10 كٷندٸك ٸس-شارا ەلدٸڭ بەرەكە-بٸرلٸگٸنٸڭ ارقاسىندا جوعارى دەڭگەيدە ٶتتٸ دەپ ەسەپتەيمٸن. "اباي اكادەميياسى" اتتى ەنتسيكلوپەدييالىق پورتال اشىلدى. بٸرنەشە كٸتاپتىڭ تۇساۋى كەسٸلدٸ. مىڭنان استام كوماندا قاتىسقان "اباي كۋيز" ينتەللەكتۋالدىق ويىنى ٶتكٸزٸلدٸ. زاعيپ جاندار مەن ناشار كٶرەتٸن ازاماتتارعا ارنالعان كٸتاپحانا ٸسكە قوسىلدى. بٷگٸن ٶزدەرٸڭٸز كٶرگەندەي, جٷلدە قورلارىنىڭ ەر ايماققا, تٸپتٸ قىرعىز ەلٸنە دەيٸن كەتكەنٸ قۋانتادى. وسى رەتتە تويدىڭ جوعارى دەڭگەيدە ٶتۋٸنە اتسالىسقان وبلىستىڭ جاناشىر ازاماتتارىنا العىس ايتامىن", - دەدٸ ايماق باسشىسى.
ون كٷنگە سوزىلعان حەكٸم تويى قاراۋىلتٶبەدە “جەلسٸز تٷندە جارىق اي" گالا-كونتسەرتٸمەن تٷيٸندەلدٸ.
فوتو: اباي وبلىسى ەكٸمدٸگٸ
