Tanymal ánshi Qairat Nurtas Shymkenttegi kontsertte bolǵan jaǵdaidy synaǵan blogerge jaýap berdi, dep habarlaidy ult.kz.
Buǵan deiin aigalium esimdi bloger áleýmettik jelide ánshiniń kontsertine barǵanyn aityp, kórermenderdiń áreketine narazylyq bildirgen. Onyń sózinshe, kontsert kezinde jurt arasynda iterisý bolyp, keibir adamdar bir-birine aiqailap, shashtan tartqan. Tipti, jinalǵandar birin-biri taptap kete jazdaǵan. Bloger kontsertte adam qaza tapty degen aqparattyń jalǵan ekenin atap ótken. Alaida onyń málimdeýinshe, birneshe kórermen meditsinalyq kómekke júgingen, al 18 jastaǵy qyz aýrýhanada qalǵan.
Sondai-aq ol jurtty bos ýaqytyn kitap oqýǵa, bilim alýǵa, sportpen ainalysýǵa jáne teatrǵa barýǵa arnaýǵa shaqyrǵan.
Bul jazbaǵa Qairat Nurtas pikir bildirip, blogerdiń sózin tym qatty dep baǵalady.
«Qatty aittyń. Onda sheteldik ánshilerdiń kontsertine bara berińder», – dep jazdy ánshi.
Aita keteiik, buǵan deiin Shymkent politsiiasy ánshiniń kontsertine qatysty jalǵan aqparat taratty degen kúdikke ilingen áieldiń anyqtalǵanyn habarlaǵan. Atalǵan is boiynsha materialdar sotqa joldanǵan.
