Massaget.kz jastar portaly Abai Qunanbaiulynyń 175 jyldyǵyna orai erekshe joba jasady, dep habarlaidy "Ult aqparat".
Portal Muhtar Áýezovtiń «Abai joly» roman-epopeiasynyń qysqasha mazmunyna doodle animatsiialy videosammari daiyndady. Videojoba QR Aqparat jáne qoǵamdyq damý ministrliginiń qoldaýymen jaryq kórip otyr.
«Abai jolynyń» qysqasha mazmuny ár taraý boiynsha daiyndaldy. Tórt tomdyq epopeia barlyǵy 28 taraýdan turady. Birinshi tomda 7 taraý, ekinshi tomda 8, úshinshi tomda 6, tórtinshi tomda 7 taraý bar. Ár videosammaridiń uzaqtyǵy – 12-15 minýt. Videosammari – kitaptyń negizgi ideiasyn, mazmunyn video túrinde usyný.
«Óskeleń urpaqqa Abai jádigerlerin nasihattap, onyń eńbekterindegi izgi oilardy darytý asa mańyzdy. Bizdiń bul jobamyz kórermen kóńilinen shyǵyp, Abaidy tanýǵa sebep bolady dep senemiz», - deidi Aqparat jáne qoǵamdyq damý ministri Aida Balaeva.
Kishkentai kórermenderdiń nazaryn aýdartyp, kartinany qabyldaý qabiletin arttyrý úshin doodle animatsiia stilinde usynyldy, dybystyq fon qosyldy. Joba jetekshisi – Ernar Almabek, sýretshisi – Tomiris Esqali, dybystaǵan – Shamshaddin Omarov.
«Abai joly» ár oqyǵan saiyn ózgeshe kúige bóleitin epopeialyq roman. Shyǵarma mektep baǵdarlamasyna kirgenimen, oqýshylar keiipkerin kózge elestetip, emotsiia keship, mazmunyn este saqtai bermeidi. Tipti eresek adamdardyń ózderi de romannyń avtoryn bilýmen ǵana shekteledi.
Abaidyń týǵan kúnine orai biz tili de, mazmuny da kúrdeli shyǵarmanyń videosammariin daiyndadyq. Endi kórermen 28 taraýdyń mazmunymen sanaýly minýttarda tanysa alady. Osylaisha kitapqa degen qyzyǵýshylyǵy oianǵan olar kúnderdiń bir kúni tom-tomdy paraqtaidy degen úmitimiz bar», - deidi joba jetekshisi Ernar Almabek.
Mazmun mátinine shyǵarmanyń negizgi bólikteri tańdalyp, jazýshynyń tili men kórkemdik quraldary saqtalǵan. Shyǵarmanyń birinshi tomyndaǵy taraýlar ár dúisenbi saiyn Massaget TV YouTube-arnasynda jariialanyp turady. Jobanyń aqparattyq seriktesi – Alash Media Group mediaholdingi.
Búgin 10 tamyz, Qazaqstandaǵy Abai kúnine orai I tomnyń «Qaitqanda» taraýy kórermen nazaryna usynylyp otyr.
