Japoniiada qazaq aqyny jáne aǵartýshysy Abai Qunanbaiulynyń japon tiline aýdarylǵan alǵashqy shyǵarmalar jinaǵynyń tusaýkeseri ótti. Sharaǵa eldiń saiasi, mádeni jáne qoǵamdyq toptarynyń, sondai-aq diplomatiialyq korpýstyń ókilderi qatysty, dep habarlaidy "Ult aqparat".
QR Syrtqy ister ministrliginen málim etkendei, Japoniia Parlamentiniń joǵarǵy palatasynyń Spikeri Akiko Santo is-sharanyń basty qonaǵy boldy. Onyń aitýynsha, Abaidyń filosofiiasy adamzattyń qazirgi kezeńdegi barlyq qiynshylyqtardy, sonyń ishinde koronavirýs pandemiiasyn eńserý úshin qajetti danalyq pen batyldyqqa úiretedi.
Elshi Erlan Baýdarbek-Qojataev biyl Abaidyń 175 jyldyǵy aiasynda búkil álem boiynsha ótkizilip jatqan is-sharalar Qazaqstannyń mádeni diplomatiiasynyń damýyna erekshe úles qosyp jatqanyn aitty.
Japoniia Mádeniet jónindegi agenttiginiń tóraǵasy Riohei Miiata óz sózinde Abai óleńderiniń jáne «Maneshiý» japon óleńderiniń kóne jinaǵynyń jalpy mazmuny uqsas bolǵanyna tánti bolǵanyn atap ótip, eki el ejelden Jibek joly arqyly bailanysqanyn jetkizdi.
Kitaptyń túsaýkeserin Kún shyǵys elinde zamanaýi japon poeziiasynyń «qozǵaýshy kúshi» dep atalyp júrgen ataqty aqyn jáne synshy Kivao Nomýra jasady.
Kórermender ánshi Rankanyń Abaidyń «Kózimniń qarasy» ánin japon tilinde oryndaýyn ystyq yqylaspen qarsy aldy.
Jalpy alǵanda, Abaidyń mereitoiy aiasynda Tokiodaǵy Qazaqstan Elshiligi biyl birqatar is-shara uiymdastyrdy.
Atap aitqanda, Abai shyǵarmalaryn mánerlep oqý estafetasyna Japoniia Parlamentiniń depýtaty jáne Qazaqstanmen Parlamenttik dostyq ligasynyń tóraǵasy Takeo Kavamýra qatysyp, QR Parlamentiniń senatory Muhtar Qul-Muhammedtiń chellendjine jaýap retinde japon tilinde «Qara sózden» úzindi oqydy.
Sonymen qatar, «Abai World Challenge» halyqaralyq videomarafonynda Japoniia aqyndar qaýymdastyǵynyń prezidenti Iamada Takaaki Abaidyń kóktemge arnalǵan óleńderiniń japonsha aýdarmasyn usyndy. Tokio ortalyq kitaphanasynda Abai Qunanbaiulynyń 175 jyldyǵyna arnalǵan kitap jáne illiýstratsiialar kórmesi ótti.
Kitap shyǵarý jobasyn QR Mádeniet jáne sport ministrliginiń tapsyrysy boiynsha Qazaqstannyń Japoniiadaǵy Elshiliginiń qoldaýymen «Ulttyq aýdarma biýrosy» qoǵamdyq qory júzege asyrdy.
Mátinderdiń ádebi aýdarmasyn Tokio shet tilder ýniversitetiniń professory Hiroki Sakai, qazaq ádebietin zertteýshi Mikiia Nishimýra, japon-qazaq sózdiginiń aýdarmashysy jáne qurastyrýshysy Shigenobý Masýdjima oryndady.
Abai Qunanbaiulynyń japon tilindegi kitaby atalmysh eldiń kitaphanalary men oqý oryndaryna taratylady.
