Qazaqtyń uly aqyny Abai shyǵarmalary álemniń 30 tiline aýdarylady, dep habarlaidy QazAqparat.
QR Syrtqy ister ministrligi baspasóz qyzmetiniń málimetinshe, Abai Qunanbaiulynyń shyǵarmalary álemniń 30 tiline aýdarylady. Munan bólek, Resei Federatsiiasynda qoldanys aiasy keń 10 tilge Abaidyń «Qara sózderi» men óleńderi ataqty jazýshylar men aýdarmashylardyń qatysýymen ijdahatpen aýdarylyp, Resei baspalarynda basyp shyǵarý josparlanǵan.
«Elshilikter M.Áýezovtyń «Abai joly» romanyn arab, túrik, grek, armian, mońǵol, vetnam tilderine aýdarýǵa atsalysýǵa daiyn. Kembridj ýniversitetiniń baspasynda Britandyq keńespen birlesip, Abaidyń óleńderi men qara sózderi kiretin jinaqty aǵylshyn jáne qazaq tilderinde basyp shyǵarylady«, - dep atap ótedi vedomstvodan.
Munan bólek, elimizdiń Syrtqy ister ministrligi QR Tuńǵysh Prezidenti – Elbasy kitaphanasymen jáne Ulttyq aýdarma biýrosymen birlesip, shet tilderde jaryq kórgen Abai shyǵarmalarynyń tusaýkeserin Germaniia, Belgiia, Liýksembýrg, Qytai, Túrkiia, Birikken Arab Ámirlikterinde ótetin halyqaralyq kitap kórmelerinde ótkizbek.
Esterińizge sala ketsek, taiaýda Aqordada Memlekettik hatshy Qyrymbek Kósherbaevtyń tóraǵalyǵymen Abaidyń 175 jyldyq mereitoiyn daiyndaý jáne ótkizý jónindegi memlekettik komissiia otyrysy ótken bolatyn. Sol jiynda 2020 jyldyń 8 qańtarynda elordadaǵy «Qazaqstan» ortalyq kontsert zalynda Hakim Abaidyń 175 jyldyq mereitoiynyń bastalýyna arnalǵan saltanatty shara ótetindigi belgili bolǵan edi.
