Foto: Facebook.com
Abai oblysynyń taǵy bir aimaqtyq brendi paida boldy. Bul týraly óńir basshysy Berik Ýáli óziniń áleýmettik jelidegi paraqshasynda jazdy, dep habarlaidy Ult.kz.
Aqsýat aýdanynyń Tarbaǵatai taýy etegindegi Eleke sazynan tabylǵan miftik altyn buǵy músini endi oblystyń kádesyilyq simvolyna ainalmaq. Ákimniń aitýynsha, bul beine túrki halyqtarynyń tarihi jady men mifologiiasynda erekshe oryn alatyn qasietti ań sanalady.
"Buǵy – túrki dúnietanymyndaǵy analyq bastaý, jol kórsetýshi, aspanmen bailanys pen shyqqan tektiń simvoly. Onyń beinesi rý tańbalarynda, kóne óner týyndylarynda jáne ańyz-ápsanalarda jii kezdesedi", – dep jazdy Berik Ýáli.
VI ǵasyrǵa tiesili arheologiialyq olja óńirdiń kóne dáýirden-aq órkeniettiń oshaǵy, saiasi jáne mádeni ortalyq bolǵanyn aiǵaqtaidy. Buǵy beinesi búgingi kúnge deiin halyq jadynda saqtalyp kelgen kieli rámiz.
Tarbaǵataidyń baýraiynan tabylǵan qasietti altyn buǵy – ult jady men tarihi tanymdy jańǵyrtatyn erekshe jádiger, deidi óńir basshysy. Endi bul beine Abai oblysynyń mádeni-tarihi qundylyqtarynyń simvoly retinde keńinen nasihattalady.
