QR Prezidenti janyndaǵy QSZI halyqaralyq zertteýler bóliminiń basshysy Ásel Nazarbetova Elbasy Nursultan Nazarbaevtyń «Abai amanaty» atty maqalasyna qatysty pikir bildirdi, dep habarlaidy QazAqparat.
«QR Tuńǵysh Prezidenti – Elbasy Nursultan Nazarbaevtyń «Abai amanaty» atty maqalasyn oqi otyryp, Abai Qunanbaiulynyń kemeńgerligi men shyǵarmashylyǵyna tereń boilap, sol arqyly Elbasynyń tulǵalyq bolmysyn taǵy bir jańa qyrynan kórýge múmkindik týdy. Abai Qunanbaiuly qoǵamnyń bir sapadan ekinshi sapaǵa aýysqan aralyq tusynda qazaq halqy úshin dara týǵan tulǵa bolsa, sol Abaidyń danalyǵymen, halqyna degen asqan janashyrlyǵy jáne súiispenshiligimen sýsyndap, Abai shyǵarmalaryn ómirlik baǵdary retinde ustanyp kelgen Nursultan Nazarbaev ta Qazaqstannyń syn saǵatta tizginin ustaǵan Kóshbasshysy boldy», - deidi sarapshy.
Maqalada Elbasy Abaidy tanýy besikten, anasy men ájesiniń tárbiesinen bastaý alǵanyn, odan keiin el taǵdyryna qatysty árbir mańyzdy, jaýapty sheshimderdiń Uly Abaidyń qaǵidalaryn basshylyqqa ala otyryp qabyldanǵandyǵymen bólisti. Eldikti ańsaǵan, birlikti kóksegen danyshpan Abaidyń amanatyn oryndaý baqyty Elbasynyń enshisinde bolǵanyn da zor maqtanyshpen jetkizgen: «Abaidyń osy armanynyń oryndalǵanyna, Esildiń jaǵasynda eńseli baitaq qalanyń irge teýip, boi kóterýine muryndyq bolǵanyma myń da bir shúkirshilik etemin».
«Abai Qunanbaiulynyń el tarihyndaǵy baǵa jetpes ornyn, onyń bai murasynyń qoǵam úshin mańyzdylyǵyn, naqyl sózderiniń ǵasyr ótse de ómirsheńdigin tereń túsingen Elbasy, táýelsizdiktiń alǵashqy qiyn jyldaryna qaramastan dana da dara Abaidyń 150 jyldyq mereitoiyn halyqaralyq dárejede, IýNESKO sheńberinde atap ótýge sheshim qabyldap, nar táýekelge barǵanyn da esimizge salyp ótti. Sol mereitoilyq is-sharalar barysynda Abaidy odan ári ulyqtaý, ómirbaiandyq derekterin qaita jańǵyrtý, ádebi, filosofiialyq jáne mýzykalyq murasyn paiymdaý, álemdik deńgeide keńinen tanytý baǵytynda irgeli jumystar atqarylǵandyǵy, aqyn shyǵarmalarynyń eki tomdyq akademiialyq jinaǵy, «Abai» entsiklopediiasy jaryq kórgeni, Abaidyń ómiri men shyǵarmashylyǵyn tutas qamtityn «Jidebai-Bórili» memlekettik tarihi-mádeni jáne ádebi-memorialdyq qoryq-mýzeii qurylǵany maqalada baiandalǵan», - deidi Á. Nazarbetova.
Biyl Uly Abaidyń 175 jyldyǵy adamzat basyna túsken kúrdeli kezeńge qaramastan, tiisti deńgeide respýblika aýqymynda, sheteldegi diplomatiialyq ókildikter aiasynda ótip jatyr.
«Sharalardyń maqsaty – Abai murasyn zaman suranystaryna sai qaita zerdeleýdiń mańyzdylyǵynda. Aita keterligi Abai Qunanbaiulynyń 175 jyldyǵyna arnalǵan is-sharalar reti Memleket basshysy Qasym-Jomart Toqaevtyń «Egemen Qazaqstan» gazetinde jariialanǵan «Abai jáne XXI ǵasyrdaǵy Qazaqstan» atty maqalasynan bastaý alǵan bolatyn», - deidi Ásel Nazarbetova.
.jpeg)