Abai oblysyndaǵy shahtada lifttiń kúrt toqtaýynan alty jumysshy zardap shekti. Oqiǵanyń naqty sebebi ázirge anyqtalǵan joq, dep habarlaidy ult.kz informburo.kz-ke silteme jasap.
Abai oblysyndaǵy Orlov shahtasynda shahta kletiniń (jerasty lifti) kúrt toqtaýynan alty jumysshy zardap shekti. Bul aqparatty KAZ Minerals kompaniiasy rastady.
Oqiǵa 1 shilde kúni bolǵan. Sol sátte shahta liftinde 15 adam bolǵan.
«Klet tómen túsip kele jatqanda tireýishterdiń (kýlak) birine otyryp qaldy. "Kýlak" – klet belgili bir jerasty qabatynda toqtaǵan kezde shyǵyp, ony bir deńgeide ustap turatyn tireýish. Tómen túsý kezinde sol tireýishterdiń biri mezgilinen buryn shyǵyp ketken. Sonyń saldarynan klet qozǵalys barysynda oǵan ilinip, kúrt toqtady», – dedi kompaniianyń korporativtik bailanystar departamentiniń menedjeri Ermek Dúzkenev.
Oqiǵadan keiin alty adam meditsinalyq kómekke júgindi. Úsheýi jeńil jaraqat alyp, tekseristen soń úilerine jiberildi. Qalǵan úsheýi Semei qalasyndaǵy aýrýhanaǵa jetkizilgenimen, keiin dárigerler olardy da shyǵaryp jiberdi. Qazirgi ýaqytta zardap shekken barlyq kenshi ambýlatoriialyq em qabyldap jatyr.
Oqiǵanyń naqty sebebi áli anyqtalǵan joq.
«Sebepteri ártúrli bolýy múmkin: júiedegi aqaý, adam faktorynan ketken qatelik nemese basqa da jaǵdailar. Ádette mundai oqiǵalardy arnaiy komissiia men ónerkásiptik qaýipsizdik bólimi tekseredi. Qajet bolǵan jaǵdaida syrtqy uiymdar da tartylady», – dedi Ermek Dúzkenev.
Eske salsaq, 27 sáýirde Orlov shahtasynda taý jynysynyń opyrylýy saldarynan bir qyzmetker qaza tapqan edi.
