اباي وبلىسىنداعى شاحتادا ليفتتٸڭ كٷرت توقتاۋىنان التى جۇمىسشى زارداپ شەكتٸ. وقيعانىڭ ناقتى سەبەبٸ ەزٸرگە انىقتالعان جوق, دەپ حابارلايدى ult.kz informburo.kz-كە سٸلتەمە جاساپ.
اباي وبلىسىنداعى ورلوۆ شاحتاسىندا شاحتا كلەتٸنٸڭ (جەراستى ليفتٸ) كٷرت توقتاۋىنان التى جۇمىسشى زارداپ شەكتٸ. بۇل اقپاراتتى KAZ Minerals كومپانيياسى راستادى.
وقيعا 1 شٸلدە كٷنٸ بولعان. سول سەتتە شاحتا ليفتٸندە 15 ادام بولعان.
«كلەت تٶمەن تٷسٸپ كەلە جاتقاندا تٸرەۋٸشتەردٸڭ (كۋلاك) بٸرٸنە وتىرىپ قالدى. "كۋلاك" – كلەت بەلگٸلٸ بٸر جەراستى قاباتىندا توقتاعان كەزدە شىعىپ, ونى بٸر دەڭگەيدە ۇستاپ تۇراتىن تٸرەۋٸش. تٶمەن تٷسۋ كەزٸندە سول تٸرەۋٸشتەردٸڭ بٸرٸ مەزگٸلٸنەن بۇرىن شىعىپ كەتكەن. سونىڭ سالدارىنان كلەت قوزعالىس بارىسىندا وعان ٸلٸنٸپ, كٷرت توقتادى», – دەدٸ كومپانييانىڭ كورپوراتيۆتٸك بايلانىستار دەپارتامەنتٸنٸڭ مەنەدجەرٸ ەرمەك دٷزكەنەۆ.
وقيعادان كەيٸن التى ادام مەديتسينالىق كٶمەككە جٷگٸندٸ. ٷشەۋٸ جەڭٸل جاراقات الىپ, تەكسەرٸستەن سوڭ ٷيلەرٸنە جٸبەرٸلدٸ. قالعان ٷشەۋٸ سەمەي قالاسىنداعى اۋرۋحاناعا جەتكٸزٸلگەنٸمەن, كەيٸن دەرٸگەرلەر ولاردى دا شىعارىپ جٸبەردٸ. قازٸرگٸ ۋاقىتتا زارداپ شەككەن بارلىق كەنشٸ امبۋلاتورييالىق ەم قابىلداپ جاتىر.
وقيعانىڭ ناقتى سەبەبٸ ەلٸ انىقتالعان جوق.
«سەبەپتەرٸ ەرتٷرلٸ بولۋى مٷمكٸن: جٷيەدەگٸ اقاۋ, ادام فاكتورىنان كەتكەن قاتەلٸك نەمەسە باسقا دا جاعدايلار. ەدەتتە مۇنداي وقيعالاردى ارنايى كوميسسييا مەن ٶنەركەسٸپتٸك قاۋٸپسٸزدٸك بٶلٸمٸ تەكسەرەدٸ. قاجەت بولعان جاعدايدا سىرتقى ۇيىمدار دا تارتىلادى», – دەدٸ ەرمەك دٷزكەنەۆ.
ەسكە سالساق, 27 سەۋٸردە ورلوۆ شاحتاسىندا تاۋ جىنىسىنىڭ وپىرىلۋى سالدارىنان بٸر قىزمەتكەر قازا تاپقان ەدٸ.
