Aqparat jáne qoǵamdyq damý ministri Dáýren Abaev jýrnalisterdi Qordai aýdanynda bolǵan qaiǵyly jaǵdai jóninde aqparat bergende obektivti bolýǵa shaqyrdy, dep habarlaidy "Ult aqparat".
«Jýrnalisterdi Qordai aýdanynda bolǵan qaiǵyly jaǵdai jóninde aqparat bergende obektivti bolýǵa shaqyramyn. Azamattardy alańdatatyn, eldi shýlatatyn málimet bermeýdi suraimyn. Baiqasańyzdar, myna janjal eń basynda tek bir aýyl deńgeiinde bolǵan. Alaida ýatsap, telegram sekildi messendjerler máseleni qozdyrǵan, jaǵdaidy ýshyqtyrǵan. Nátijesin kórip otyrsyzdar. Birneshe adam qaza taýyp, jaraqat aldy», - dedi Dáýren Abaev OKQ-da ótken baspasóz máslihatynda.
Ministr árbir taratqan aqparatqa jaýap baryn umytpaý kerektigin aityp ótti.
«Bul da aitylǵan sóz siiaqty – qaitara almaisyz. Sondyqtan aýdio-videony taratqan kezde abai bolyńyzdar. Siz taratqan aqparattan kinásiz bireýdiń zardap shekpeýin oilaý qajet. Osy tusta tek jýrnalisterge ǵana emes, elimizdiń árbir azamatyna eskertkim keledi. Biz «Adamzattyń bárin súi, baýyrym dep» degen Abaidyń elimiz ǵoi, aǵaiyn. Asyǵys sheshim qabyldamaiyq. Sabyr saqtaiyq. Bul janjaldy bastaǵandar eshqaida qashyp qutyla almaidy. Qazir internetke, barlyq áleýmettik jelige, messendjerge monitoring jasalýda. Ol jerde video-aýdiohabarlar – barlyǵy qadaǵalanady», - dedi ol.
Dáýren Abaev qazirdiń ózinde birneshe qoldanýshylar anyqtalyp otyrǵanyn, olar ultaralyq arazdyqty qozdyratyn habardy taratqanyn jetkizdi.
«Dezinformatsiia týdyrǵan. Ol málimetter quqyqqorǵaý organdaryna beriledi. Bul janjandy bastaǵandar da, oǵan qosa barlyq provokatorlar da jaýapqa tartylady. Komissiia qazir Qordai aýdanyna bara jatyr. Barlyq jaǵdaidy komissiia habarlaidy. Biz qazir QHA ókilderin, jergilikti aqsaqaldardy, qoǵam qairatkerlerin, imamdardy tarta otyryp, halyqty sabyrǵa shaqyramyz. Qazir eldi dúrliktiretindei negiz joq. Jaǵdai baqylaýda», - dedi ol.
Eske sala ketsek, buǵan deiin Ishki ister ministri Erlan Turǵymbaev Qordaidaǵy oqiǵa saldarynan 8 adamnyń kóz jumǵanyn málim etken edi.
