QR Prezidenti janyndaǵy Memlekettik basqarý akademiiasynda «A» korpýsynyń memlekettik qyzmetshilerine arnalǵan arnaiy kýrstardyń jańa bólimi bastaldy. Bul týraly Memlekettik qyzmet isteri agenttiginiń baspasóz qyzmeti habarlady.
Elbasy – Tuńǵysh Prezident N.Á. Nazarbaevtyń «Strategiia-2050: qalyptasqan memlekettiń baǵyty» atty Qazaqstan halqyna Joldaýyna sáikes, 2013 jyly elimizde memlekettik saiasattyń naqty baǵyttaryn iske asyrýǵa jaýapty kásibi basqarýshylardyń jańa toby – «A» korpýsy jasaqtalǵan edi.
«Bul saiasi qyzmetshilerdiń sanyn 6 esege – 3,2 myńnan 538 adamǵa deiin qysqartýǵa jáne memlekettik qyzmettiń qazirgi úsh satyly modelin qalyptastyrýǵa múmkindik berdi. Eger saiasi korpýs tiisti bir baǵyt pen salany damytýdyń strategiialyq baǵyttaryn aiqyndasa, «A» korpýsy strategiialyq sheshimder qabyldaý men olardyń oryndalýy arasyndaǵy sabaqtastyqty qamtamasyz etedi. Búgingi tańda «A» korpýsynyń shtattyq sany 84 adamdy quraidy. Memleket basshysy Q.K. Toqaev «Bolashaq kóshbasshy memleketterdiń básekege qabilettiligi daǵdarystar men irgeli ózgerister dáýirinde týyndap jatqanyna» nazar aýdardy. Sondyqtan QR Memlekettik qyzmet isteri agenttigi basshylardyń jańa býynyn qalyptastyrýǵa, atap aitqanda, olardyń quzyretteri men kásibiligin damytýǵa kóp kóńil bóledi», - dedi MQIA tóraǵasy Anar Jaiylǵanova.
Atalǵan kýrs úshinshi ret uiymdastyrylyp otyr jáne «A» korpýsynyń oqýyn túiindeidi. Bul kýrstarda Konstitýtsiialyq Keńestiń, Joǵary Sottyń, Reformalardy strategiialyq josparlaý jónindegi agenttiginiń, Esep komitetitiń jáne t.b. apparat basshylary men komitet tóraǵalary, jalpy sany 25 adam oqyp jatyr. Oqytý barysynda jobalyq menedjment, jumys protsesinde týyndaityn teketirester, qarjy jáne fiskaldyq menedjment, biznes-úderister reinjiniringi, memlekettik qyzmet kórsetý tásilderiniń transformatsiiasy máseleleri qarastyrylǵan.
Sonymen birge, MQIA tóraǵasy Anar Jaiylǵanova atalǵan kýrstar arqyly jańa formatsiia basshylary strategiialyq kóshbasshylyq, ózgeristerdi basqarý jáne tiimdi kommýnikatsiialar siiaqty qasietterdi boiyna sińirip, óz quzyretterin damytýǵa múmkindik alatynyna senim bildirdi.
Arnaiy kýrstar 21 qarashaǵa deiin jalǵasady.
