Jelide 1990 jyldary Germaniiaǵa kóship ketken qaraǵandylyq ulty nemis ájeidiń qazaqsha bata berip otyrǵan videosy tarady. Jeli qoldanýshylary qazaqshaǵa tili jatyq qariianyń bata berýine tańǵalǵan, dep jazady KAZ.NUR.KZ.
Jelide "nemis apanyń" dastarhan basynda qazaqsha bata berip otyrǵan videosy qyzý talqylandy. Video sipattamasynda belgisiz áieldiń 90 jyldary Qaraǵandy oblysynan Germaniiaǵa qonys aýdarǵan nemis ultynyń ókili ekeni aitylady. Jeti shelpek pen baýyrsaqqa toly qazaq dastarhanynda otyrǵan kópshilik nemis ájeidiń batasyn uiyp tyńdap, qol jaiady.
"Paiǵambardyń baǵyn bersin,
Súleimenniń taǵyn bersin!
Baq baǵyp júrsin,
Qydyr daryp júrsin!
Qudaiym ár páleden qaǵyp júrsin!
Ólige iman, tirige bereke bersin!
Eki dúnieniń abyroiyn bersin!
Qai-qaisynyń otbasyna Allanyń berer jaqsylyǵy taýsylmasyn! Baqytty bolyńdar, qaraqtarym! Allahý akbar!", - deidi nemis ájei.
Jeli qoldanýshylary qazaqshaǵa tili jatyq qariianyń bata berýine tańǵalǵan.
"Myna videoda 1990 jyldary Qaraǵandy oblysy, Shet aýdanynan Germaniiaǵa kóshken nemis apamyzdyń bata berýine tań qalyp otyrmyn. Tildi qalai meńgergen deseishi. Mundai bata bere alatyn aqsaqaldar ózimizde de az qaldy. Zaman solai ma, adam solai ma belgisiz", - deidi videony paraqshasynda bólisken bloger Baýyrjan Serikbaev.
Basqa jeli qoldanýshylary da "nemis apaǵa" riza bolǵandaryn jazdy. Olar tildi óte joǵary deńgeide meńgerip qana qoimai, sonsha jyl ótse de dástúrdi umytpaǵan ózge ult ókiline tańdai qaǵýda.
"Tekti halyq qoi. Soltústik óńirde tursa da qazaqsha biletin talaiyn kórdik. Álde til úirený qabiletteri myqty?!", " Aqadyrda osyndai nemis kórshilerimiz bolyp edi. Qandai adal jandar edi", - deidi jeli qoldanýshylary.
