Atyraý oblysynda biýdjet qarajatyn asa iri kólemde jymqyrý isi boiynsha sottalǵan memlekettik mekemeniń esepshisine qoldanylǵan raqymshylyqtyń kúshi joiyldy. Bul týraly "Aq Jaiyq" basylymy habarlady, dep habarlaidy ult.kz.
Bas prokýratýranyń málimetinshe, 2023–2024 jyldary esepshi mekeme basshysymen sóz bailasyp, 88,8 million teńgeden astam biýdjet qarajatyn zańsyz iemdengen.
Birinshi satydaǵy sot áieldi jeti jylǵa bas bostandyǵynan aiyrǵan. Alaida keiin raqymshylyq týraly zań negizinde jaza merzimi tórt jyl segiz aiǵa deiin qysqartylǵan.
Keiin Bas prokýratýra raqymshylyqtyń zań talaptaryna qaishy qoldanylǵanyn anyqtady. Qoldanystaǵy zań boiynsha asa iri kólemdegi jymqyrý qylmysy úshin jaza keltirilgen zalal tolyq ótelgen jaǵdaida ǵana qysqartylýy múmkin. Alaida sottalǵan azamatsha memleketke keltirilgen shyǵyndy tolyq ótemegen.
Sonymen qatar odan 36,8 million teńgeden astam qarajatty óndirip alý týraly sot qaýlysy shyǵarylǵan. Soǵan qaramastan, birinshi satydaǵy sot jazany úshten birge qysqartqan, al apelliatsiialyq sot bul sheshimdi ózgerissiz qaldyrǵan.
Bas prokýratýranyń kassatsiialyq narazylyǵy nátijesinde raqymshylyqty qoldaný týraly sheshimniń kúshi joiylyp, bastapqy úkim – jeti jylǵa bas bostandyǵynan aiyrý jazasy qaita kúshine endi.
Prokýratýra zańda kózdelgen talaptardyń biri – keltirilgen zalal tolyq ótelmeiinshe raqymshylyq qoldanylmaitynyn taǵy bir márte eske saldy.
