Qazaqstanda onlain-platformalarda balaǵat sóz qoldanǵany úshin ákimshilik jaýapkershilik engizý josparlanyp otyr. Bul týraly Premer-ministr Oljas Bektenov Májilis depýtattarynyń saýalyna bergen jaýabynda málimdedi, dep habarlaidy ult.kz.
Úkimet basshysynyń aitýynsha, qoldanystaǵy Ákimshilik quqyq buzýshylyq týraly kodekstiń 434-babyna sáikes qoǵamdyq oryndarda balaǵat sóz aitý, azamattarǵa tiisý jáne qoǵamdyq tártipti buzatyn ózge de áreketter usaq buzaqylyq retinde baǵalanady.
Mundai quqyq buzýshylyq úshin 20 ailyq eseptik kórsetkish (86 myń teńgeden astam) kóleminde aiyppul salý, 20-dan 60 saǵatqa deiin qoǵamdyq jumystarǵa tartý nemese 5-ten 15 táýlikke deiin ákimshilik qamaýǵa alý jazasy qarastyrylǵan.
Oljas Bektenovtiń málimetinshe, qazir «Qazaqstan Respýblikasynyń Ákimshilik quqyq buzýshylyq týraly kodeksine onlain-platformalar jáne buqaralyq aqparat quraldary máseleleri boiynsha ózgerister men tolyqtyrýlar engizý týraly» zań jobasy ázirlengen.
Qujatta ÁQBtK-niń 434-babyn tolyqtyryp, onlain-platformalarda balaǵat sóz qoldanǵany úshin ákimshilik jaýapkershilik belgileý kózdelip otyr.
