Halyqqa qyzmet kórsetý ortalyqtarynyń (HQKO) karantin jaǵdaiyndaǵy jumysy, ondaǵy búgingi problemalar men onyń sheshimi týraly QazAqparat tilshisine «Azamattarǵa arnalǵan úkimet» memlekettik korporatsiiasynyń basqarýshy direktory Murat Jumanbai aityp berdi.
«Karantin jaǵdaiyna bailanysty bizdiń korporatsiianyń kóptegen qyzmetterin qalyń kópshilik onlain túrde alyp jatyr. Iaǵni, olarda úide otyryp, elektrondy túrde ótinish qaldyryp, qajetti qyzmetti alý múmkindigi bar. Osy turǵyda «Ulttyq aqparattyq tehnologiialar» AQ elektrondy tsifrlyq qoltańbany onlain túrde alýǵa múmkindik jasady. Sońǵy 2 aidyń ishinde 700 myń qazaqstandyq elektrondy tsifrlyq qoltańbany onlain túrde aldy. Halyqqa qyzmet kórsetý ortalyqtaryndaǵy halyq jii tutynatyn ekinshi qyzmet túri ol qujattandyrý. Onyń ishinde merziminiń bitýine bailanysty jeke kýálikti nemese kólik tólqujatyn aýystyrý. Sondai-aq, jaz mezgili bolǵandyqtan avtomobil kólikterin tirkeý jáne rásimdeý qyzmeti turǵyndar arasyndaǵy eń kóp suranysqa ie qyzmet bolyp otyr», - dedi Murat Jumanbai.
Sondai-aq, basqarýshy direktor halyqqa qyzmet kórsetý ortalyqtarynyń jumysyna qatysty azamattardan kelip túsetin shaǵymdar týraly aityp ótti.
«Ózińiz biletindei, karantin kóp jaǵdaiǵa shekteý engizdi. Buryn azamattarymyz qyzmetter men anyqtamalardy halyqqy qyzmet kórsetý ortalyǵyna tikelei kelip alatyn. Qazir ortalyqqa kelýdiń qajeti joq, bárin onlain túrde alýǵa bolady. Osy turǵyda keibir azamattar tarapynan túsinispeýshilik týyndap, nege ózimiz kelip almaimyz degen suraqtar qoiylyp, shaǵymdar kelip tústi. Iaǵni bastapqyda halyqqa onlain túrde qyzmet alýdy úiretýde kedergiler týyndady. Ýaqyt óte kele halyq onyń tiimdi ekenin túsindi. Ekinshi másele, HQKO-daǵy kezekti brondaýǵa qatysty bolyp otyr. Degenmen bul problema negizinen mamandandyrylǵan halyqqa qyzmet kórsetý ortalyǵynyń jumysyna qatysty. Al jalpy HQKO-da kezek problemasy joq. Mamandandyrylǵan halyqqa qyzmet kórsetý ortalyǵynyń taǵy bir problemasy ol deldaldyq. Bul poblema ásirese zańsyz jumys isteitin saqtandyrý kompaniialaryna qatysty bolyp otyr. Olar syrttan HQKO-na kelgen adamdardy ańdyp turyp, óz qyzmetterin usynyp, paida tabady. Biz osy problemany joiý úshin mamandandyrylǵan HQKO-da óz-ózine qyzmet kórsetý alańyn ashtyq. Ol jerde kompiýter men mamandardan keńes alý qyzmeti qarastyrylǵan. Ótken aptada quqyq qorǵaý organynyń ókilderi «óz qyzmetterin» usynǵan 4 deldaldy ákimshilik jaýap tartty», - dedi ol.
