Foto: kaztag.kz
Joǵary aýditorlyq palatanyń tóraǵasy Natalia Godýnova jobalyq-smetalyq qujattamany daiyndaǵan kezde biýdjet aqshasy tiimsiz jumsalatynyn málimdedi, dep habarlaidy Sputnik Qazaqstan saity.
Onyń aitýynsha, biýdjet qarajatyn tiimsiz jumsaý merdigerler men ónim berýshiler arqyly kóbirek júzege asyrylady.
"Osydan tórt jyl buryn biz jobalaý-smetalyq qujattamany asyra baǵalaý 30%-ke deiin kóterilgenin, osy somany jylyna trillion teńge dep baǵaladyq. Al qazir qurylys materialdarynyń qymbattaǵanyn, infliatsiia deńgeiiniń kóterilgenin paidalanyp, jobalardyń qymbattaýy epidemiiaǵa ainaldy jáne birneshe trillionǵa jetti. Al osy aqshaǵa sheshimin tappai kele jatqan apatty jáne úsh aýysymdy mektepter salý máselesin sheshýge, nemese basym bóliginiń jaǵdaiy múshkil jylý elektr ortalyqtary men jylý jelilerin jóndeýge bolatyn edi", - dedi Godýnova Májilis otyrysynda.
Ol Úkimet eshqashan qarjylandyrylmaityn jobalaý-smetalyq qujattamaǵa mór basýdy jalǵastyryp kele jatqanyn atap ótti.
"Mysaly, 2017-2018 jyldary quny 5,9 mlrd teńgege ázirlengen 292 jobalaý-smetalyq qujattama qajetsiz bolyp qaldy. Bir sózben aitqanda, memlekettik organdar resýrstary shekteýli bola tura, artyp kele jatqan qajettilikterdi qanaǵattandyrý ónerin áli igere qoiǵan joq. Sondyqtan tańdap alynǵan salalyq saiasatty iske asyrýda basymdyq pen júielilik mańyzdy", - dedi Godýnova.
