Qazaqstan Respýblikasy Ishki ister ministrligi munai ónimderi men janar-jaǵarmaidy el aýmaǵynan zańsyz shyǵarýǵa qarsy kúresti kúsheitti. Vedomstvo málimetinshe, sońǵy bir aidyń ózinde shamamen 12 tonna janarmaidy zańsyz áketý áreketiniń joly kesilgen, dep habarlaidy ult.kz.
Polisia.kz jazýynsha, qazirgi ýaqytta memlekettik shekaradaǵy 48 avtokólik ótkizý pýnktinde patrýldik politsiianyń 59 beketi jumys istep tur. Politsiia qyzmetkerleri kólemi ulǵaitylǵan janarmai baktarymen jabdyqtalǵan kólikterdi anyqtap, olardyń zańsyz áreketterine tosqaýyl qoiýda.
IIM ásirese shekara mańynda ornalasqan Jambyl, Túrkistan jáne Mańǵystaý oblystaryna erekshe nazar aýdaryp otyr. Bul óńirlerde qaita jabdyqtalǵan kólikterdi anyqtaý jáne zańsyz janarmai tasymalynyń aldyn alý boiynsha qosymsha sharalar qabyldanǵan.
Sonymen qatar quqyq qorǵaý organdary kólikterge qosymsha janarmai baktaryn ornatýmen ainalysatyn tehnikalyq qyzmet kórsetý stantsiialaryn tekserýde. Máselen, Qordai aýylynda politsiia men memlekettik kirister organdarynyń qyzmetkerleri birlesip 16 tehnikalyq qyzmet kórsetý stantsiiasyna tekserý júrgizgen. Nátijesinde alty nysan iesine qatysty ákimshilik materialdar rásimdeldi.
IIM málimetinshe, sońǵy aida qaita jabdyqtalǵan janarmai baktary bar 54 avtokólik anyqtalyp, olardyń ieleri ákimshilik jaýapkershilikke tartylǵan.
Vedomstvo munai ónimderi men janar-jaǵarmaidyń zańsyz tasymalyna qarsy kúres jalǵasatynyn jáne bul másele ministrdiń turaqty baqylaýynda ekenin atap ótti.
