Tótenshe jaǵdai kezinde tabysynan aiyrylǵan azamattarǵa 42 500 teńge kómek qarajat 3 mln 313 adamǵa taǵaiyndaldy, dep habarlaidy "Ult aqparat" QR Prezidenti Ákimshiliginiń Qoǵamdyq qabyldaý bólmesiniń telegram kanalyna silteme jasap.
«Búgingi tańdaǵy sońǵy aqparattar boiynsha, tótenshe jaǵdai kezinde tabysynan aiyrylǵan azamattarǵa 42 500 teńge kómekti tóleý 3 mln 313 adamǵa taǵaiyndalyp, ol járdem aqynyń jiyntyq somasy 140, 8 mlrd teńgeni qurap otyr. Jalpy alǵanda kómek surap, 6 mln 244 adam ótinish túsirgen. Baqylap, tekserý barysynda, jiberilgen qatelerge (derekteri talapqa sai emes) qatysty 2 mln 292 myń adamnyń ótinishi qanaǵattandyrylǵan joq» - delingen habarlamada.
Eske sala ketsek, Memlekettik komissiianyń shuǵyl shtaby «42 500 teńge» tólemin taǵaiyndaý erejesindegi ózgeristerdi jariialady.
Sondai-aq, QR Eńbek jáne halyqty áleýmettik qorǵaý ministrligi 42 500 teńgeden áleýmettik tólem alǵandardyń tizimi tótenshe jaǵdai aiaqtalǵannan keiin zań júzinde qaita tekseriletinin málim etti.
Áleýmettik tólemderdi zańsyz alǵan adamdardyń jaýapkershilikke tartylýy olardyń jasaǵan zańsyz áreketine bailanysty bolady. Osy rette, 42 500 teńge kómek qatelesip túsken azamattarǵa aqshany qaitarý tetikteri usynyldy. Budan bólek, kelip túsken 5,9 mln ótinimniń 2,15 milliony nemese 37 paiyzy nelikten qanaǵattandyrylmaǵany túsindirildi.
16 sáýir, saǵat 11:00-degi jaǵdai boiynsha barlyǵy 3 mln 79 myń 960 adamǵa 42500 teńgeden tólengen edi.
