Soltústik Qazaqstan oblysynda 13 jastaǵy qyzǵa qatysty aýyr qylmys jasaldy degen aqparat áleýmettik jelilerde keńinen tarady, dep habarlaidy ult.kz.
Aldyn ala málimetterge sáikes, oqiǵa 1 shilde kúni Aiyrtaý aýdanynda bolǵan. Jergilikti turǵyndardyń aitýynsha, keshki ýaqytta dúkennen shyqqan 13 jastaǵy qyzdy kórshi aýyldyń shamamen 40 jastaǵy turǵyny mototsiklmen kelip, serýendeýge shaqyrǵan. Osydan keiin jasóspirimniń úiine oralmaǵany habarlanǵan.
Taraǵan aqparatqa sáikes, qyzdy týystary men aýyl turǵyndary túni boiy izdep, kelesi kúni tańerteń eldi mekennen tys jerden tapqan. Áleýmettik jelilerde oǵan qatysty zorlyq-zombylyq jasalǵan bolýy múmkin degen málimet jariialandy.
Alaida bul aqparat ázirge resmi túrde rastalǵan joq. Quqyq qorǵaý organdary oqiǵaǵa qatysty ázirge eshqandai resmi málimdeme jasamady.
