Ulttyq statistika biýrosy apta basynda elde ortasha jalaqy mólsheri 275 myń teńgege jetkenin habarlady. Statistikaǵa qaraǵanda jumysshylardyń ailyq tabysy anaǵurlym ósken. Alaida buqara bul sandarǵa senbeidi. Ótken aptada Májilis depýtaty da bularǵa shúiligip edi. "Ótirik málimet taratady" dep sókken.
Statistika biýrosy maýsym saiyn eldegi ortasha jalaqy mólsherin jariialap turady. Osy joly buqaranyń ailyq tabysy 275 myń teńgeden asty dedi. Estigen jurt "dý" ete qaldy, dep habarlady Sputnik Qazaqstan agenttigi Habar 24 arnasyna silteme jasap.
"Jumysshylardyń ailyǵy – 60-70 myń. Qazaqstanda ortasha jalaqy 250 myń teńge degenge men kelise almaimyn. Tamaǵyńa tartsań, páterińe jetpeidi. Páterińe tartsań, sýyńa jetpeidi... Balalardyń sabaǵyna tóleý kerek, tamaq alý kerek, kvartplata tóleý kerek. Keibireýler 50 myń alady, 40 myń alatyndar da bar ǵoi. Ortasha 250 myń degenge senbeimin. Meili sók, meili maqta – bul "sandyraqqa" senbeimiz", - deidi turǵyndar.
Halyq "nege eldi aralamaidy, jaǵdaidy nege kózben kórmeidi" dep ashýlandy. Ótken aptada Májilis depýtaty da shamyrqanyp edi.
"Ulttyq statistika biýrosy byltyr eldegi ortasha jalaqy mólsheri 257 myń teńge dep málimet taratty. Shyny kerek, buqarany aitpaǵanda, buǵan statistika júrgizip otyrǵan mamandardyń ózi senbeidi. Memleket basshysy kásipkerlermen kezdeskende aitty ǵoi. "Halyqtyń deni ai saiyn 50 myń teńge alady. Buǵan ómir súrýge bolmaidy" dedi. Statistika eldiń shynaiy ómirin kórsetý kerek. Al qazirgi sandardy quddy aspannan alǵandai", - dedi parlament májilisiniń depýtaty Elnur Beisenbaev.
Arqa jaily bolsa, arqar aýyp nesi bar?! Depýtattar "eldiń jaǵdaiy qaǵazda jazylǵandai bolsa, bulqynbas edi" dep otyr.
"Ómir kórsetkendei, halyqtyń jappai kedeilenýi memleketke óte qymbatqa túsedi! Ishki jalpy ónimniń eselep ósýine qaramastan Qazaqstan ondaǵan jyl boiy kedeilik shegin kótermei keledi. Búginde Qazaqstan eń tómengi kúnkóris deńgeii álemdegi eń tómen elderdiń biri jáne Nigeriia, Angola, Venesýela, Gabon siiaqty elderdiń deńgeiinde tur", - deidi májilis depýtaty Erlan Sairov.
"Mynanyń jalaqysy kóbirek, al mynaý azyraq alady"dep jiliktep jazyp júrgen mamandar ortasha jalaqyny qalai esepteitinin túsindirdi.
"Elimizde ailyq tabysy kóbirek jáne azdaý jalaqy alatyndar bar. Solardyń ailyǵyn qosamyz. Shyqqan jalaqy qoryn ailyq alatyn adamdardyń sanyna bólemiz. Sol kezde osyndai sandar shyǵady. Mundai ádisti kóptegen el qolanady. Muny ortaq tásil deýge bolady", - deidi Ulttyq statistika biýrosy departamentiniń bas sarapshysy Almagúl Sámetova.
Mundai ádis kóptegen elde keńinen qoldanylady. Biraq solardyń deni damyǵan elder. Kóshti alpaýyttar bastaidy. Al Qazaqsan syndy áleýmettik teńsizdik beleń alǵan elde bul ádisti qoldaný halyqtyń shynaiy turmysyn kórsetýge kedergi keltirip otyr. Muny statistika júrgizip otyrǵan mamandardyń ózi moiyndaidy.
Almagúl Sámetova "elimizde mundai jalaqy alatyndar qanshama?" degen suraqqa "halyqtyń shamamen 6 protsenti" dep jaýap berdi.
Jaǵdaiy jutań jandar kóbeiip ketse, memleket keleńsizdikke tap bolady. Bul ekonomikanyń qarapaiym qaǵidasy. Bálkim Qazaqstanda shynymen ortasha jalaqy mólsherin anyqtaýdyń basqa ádisin qoldanatyn kez jetken bolar.
