QR Indýstriia jáne infraqurylymdyq damý ministrligi 4 paiyzdyq avtonesie baǵdarlamasyn qaita jandandyrýdy usynyp otyr. Bul týraly vitse-ministr Marat Qarabaev «Habar» telearnasyndaǵy «Bolshaia nedelia» baǵdarlamasynda málim etti, dep habarlaidy QazAqparat.
«Memleket basshysynyń aldymyzǵa qoiǵan eń basty máselesi avtomobildiń qoljetimdiligin qamtamasyz etý boldy. 2015-2018 jyldar aralyǵynda osy maqsatqa 82 mlrd teńge bólingen bolatyn. Revolerlik qaitarymyn eskersek, 142 mlrd teńgege deiin ósken. Osyndai 4 paiyzdyq utymdy baǵdarlama arqyly qazaqstandyqtar 30 myńdai kólik satyp alǵan. Qazir ol baǵdarlama boiynsha aqsha bólinip jatqan joq. Biraq revolerlik qaitarymy áli ainalymda júr. Onyń mólsheri suranysty qanaǵattandyrýǵa jetpeidi. Biz ony moiyndaimyz», - dedi Marat Qarabaev.
Osyny eskergen vedomstvo mynadai shara usynyp otyr.
«Máseleni sheshýdiń bir joly retinde ÓKM shottarynda jinaqtalǵan qarajattyń belgili bir bóligin halyqqa 4 paiyzdyq avtonesie retinde berýdi usynamyz. Iaǵni, ÓKM shottaryndaǵy qarajat halyqqa avtonesie retinde baǵyttalady. Taǵy bir utymdy tetik dep oilaimyn, buryn 4 paiyzdyq baǵdarlamaǵa qatysý úshin 20 paiyz óz qarajatyńdy salý kerek bolsa, endi alǵashqy jarnany alyp tastaý máselesin qarastyryp jatyrmyz. Sonda Qazaqstannyń qarapaiym azamaty avtosalonǵa kelip kólik tańdaidy da, bir de bir teńge tólemesten, 4 paiyzǵa avtoneise alady», - dedi vitse-ministr.
Buǵan deiin 4 paiyzdyq nesie kez kelgen klastaǵy avtomobilge beriletin. Onyń ishinde qymbat kólikter de osy nesiemen satyp alynatyn.
«Endi biz bul nesieni naqty orta klastaǵy kólikterge baǵyttamaqshymyz. Iaǵni, biýdjettik avtomobilder sanatyn jasap, naqty bir somadan aspaýyn qadaǵalaimyz. Ol somany áli talqylaimyz. Osy tetik boiynsha halyqtyń kólik alýyna ǵana jol ashpai, qalalardyń avtobýs parkin de jańartýdy oilastyryp jatyrmyz», - dedi ministrdiń orynbasary.
