قر يندۋسترييا جەنە ينفراقۇرىلىمدىق دامۋ مينيسترلٸگٸ 4 پايىزدىق اۆتونەسيە باعدارلاماسىن قايتا جانداندىرۋدى ۇسىنىپ وتىر. بۇل تۋرالى ۆيتسە-مينيستر مارات قاراباەۆ «حابار» تەلەارناسىنداعى «بولشايا نەدەليا» باعدارلاماسىندا مەلٸم ەتتٸ, دەپ حابارلايدى قازاقپارات.
«مەملەكەت باسشىسىنىڭ الدىمىزعا قويعان ەڭ باستى مەسەلەسٸ اۆتوموبيلدٸڭ قولجەتٸمدٸلٸگٸن قامتاماسىز ەتۋ بولدى. 2015-2018 جىلدار ارالىعىندا وسى ماقساتقا 82 ملرد تەڭگە بٶلٸنگەن بولاتىن. رەۆولەرلٸك قايتارىمىن ەسكەرسەك, 142 ملرد تەڭگەگە دەيٸن ٶسكەن. وسىنداي 4 پايىزدىق ۇتىمدى باعدارلاما ارقىلى قازاقستاندىقتار 30 مىڭداي كٶلٸك ساتىپ العان. قازٸر ول باعدارلاما بويىنشا اقشا بٶلٸنٸپ جاتقان جوق. بٸراق رەۆولەرلٸك قايتارىمى ەلٸ اينالىمدا جٷر. ونىڭ مٶلشەرٸ سۇرانىستى قاناعاتتاندىرۋعا جەتپەيدٸ. بٸز ونى مويىندايمىز», - دەدٸ مارات قاراباەۆ.
وسىنى ەسكەرگەن ۆەدومستۆو مىناداي شارا ۇسىنىپ وتىر.
«مەسەلەنٸ شەشۋدٸڭ بٸر جولى رەتٸندە ٶكم شوتتارىندا جيناقتالعان قاراجاتتىڭ بەلگٸلٸ بٸر بٶلٸگٸن حالىققا 4 پايىزدىق اۆتونەسيە رەتٸندە بەرۋدٸ ۇسىنامىز. ياعني, ٶكم شوتتارىنداعى قاراجات حالىققا اۆتونەسيە رەتٸندە باعىتتالادى. تاعى بٸر ۇتىمدى تەتٸك دەپ ويلايمىن, بۇرىن 4 پايىزدىق باعدارلاماعا قاتىسۋ ٷشٸن 20 پايىز ٶز قاراجاتىڭدى سالۋ كەرەك بولسا, ەندٸ العاشقى جارنانى الىپ تاستاۋ مەسەلەسٸن قاراستىرىپ جاتىرمىز. سوندا قازاقستاننىڭ قاراپايىم ازاماتى اۆتوسالونعا كەلٸپ كٶلٸك تاڭدايدى دا, بٸر دە بٸر تەڭگە تٶلەمەستەن, 4 پايىزعا اۆتونەيسە الادى», - دەدٸ ۆيتسە-مينيستر.
بۇعان دەيٸن 4 پايىزدىق نەسيە كەز كەلگەن كلاستاعى اۆتوموبيلگە بەرٸلەتٸن. ونىڭ ٸشٸندە قىمبات كٶلٸكتەر دە وسى نەسيەمەن ساتىپ الىناتىن.
«ەندٸ بٸز بۇل نەسيەنٸ ناقتى ورتا كلاستاعى كٶلٸكتەرگە باعىتتاماقشىمىز. ياعني, بيۋدجەتتٸك اۆتوموبيلدەر ساناتىن جاساپ, ناقتى بٸر سومادان اسپاۋىن قاداعالايمىز. ول سومانى ەلٸ تالقىلايمىز. وسى تەتٸك بويىنشا حالىقتىڭ كٶلٸك الۋىنا عانا جول اشپاي, قالالاردىڭ اۆتوبۋس پاركٸن دە جاڭارتۋدى ويلاستىرىپ جاتىرمىز», - دەدٸ مينيستردٸڭ ورىنباسارى.
