100 jylqyny jymqyrdy dep 7 jylǵa sottalǵan Rahat Sársenov aqtalyp shyqty. Oǵan halyq jylqy atap, qarjylai kómektesip jatyr, dep habarlaidy ult.kz.
Aqtóbe oblystyq soty 60 jastaǵy jylqyshy Rahat Sársenovke qatysty shyǵarylǵan úkimdi qaita qarap, ony sot zalynan bosatty. Rahat Sársenov 1994 jyldan beri bir qojalyqtyń jylqysyn baǵyp kelgen. Jyldar boiy mal sońynda júrip, aýyr eńbek etken ol insýlt alyp, aýrýhanaǵa túsken kezde ústinen aryz túsip, qamaýǵa alynǵan.
Keshe ǵana jylqyshy kásipkerdiń arqasynda baspanaly boldy.
Sonymen qatar asaba Sabyrjan da 10 jylqy atap, qariiany qýantty.
Aita keteiik, Rýslan Ótepbai jylqyshy Rahat Sársenovtiń burynǵy jumys berýshisi Tájiǵali Eleýovpen arnaiy kezdesip, qoǵamda qyzý talqylanyp júrgen máselelerge qatysty kólemdi suhbat jazǵanyn málimdedi.
Jýrnalistiń aitýynsha, suhbat barysynda Rahat Sársenovtiń uzaq jyldar boiǵy eńbek joly, jumys berýshimen aradaǵy qarym-qatynasy, sondai-aq sońǵy ýaqytta qoǵam nazaryn aýdarǵan oqiǵalar jan-jaqty sóz bolǵan.
Rýslan Ótepbaidyń aitýynsha, áńgime sońynda ol Tájiǵali Eleýovke el azamattarynyń qoldaýynyń arqasynda Rahat Sársenovtiń otbasy baspanaly bolǵanyn jetkizgen. Alaida kásipker bul sózge kútpegen jaýap qaitaryp, jurtshylyqtyń nazaryn aýdarǵan málimdeme jasaǵan.
«Rahat Sársenovtiń otbasy baspanaly boldy» degenimde, ol: «Ol meniń aqshama alynǵan úi», – dep jaýap berdi», – deidi Rýslan Ótepbai.
