Aqtóbe oblystyq soty 60 jastaǵy jylqyshy Rahat Sársenovke qatysty shyǵarylǵan úkimdi qaita qarap, ony sot zalynan bosatty, dep habarlaidy ult.kz.
Buǵan deiin ol qojalyq iesiniń aryzynan keiin 100 jylqyny jymqyrdy degen aiyppen 7 jylǵa bas bostandyǵynan aiyrylyp, moinyna shamamen 30 million teńge shyǵyn ilingen bolatyn. Alaida apelliatsiialyq sotta usynylǵan qosymsha dálelder nátijesinde bir ǵana jylqynyń joǵalǵany anyqtaldy.
Apelliatsiialyq sot otyrysy emotsiiaǵa toly ótti. Ómiriniń 33 jylyn jylqy baǵýǵa arnaǵan Rahat Sársenov úkim ózgergennen keiin sot zalynan bostandyqqa shyqty. Densaýlyǵy syr bergen azamat sot barysynda sóilei almai, kóz jasyna erik berdi. Onyń insýltten keiin bir qoly men bir aiaǵy tolyq jumys istemei qalǵan, sóileýi de qiyndaǵan.
Marqum emes, kózi tiri baýyrynyń taǵdyry úshin kúresken ápkesi Altynai Sársenova onyń ómir boiy adal eńbek etkenin aityp, qojalyq iesiniń áreketine narazylyq bildirdi.
Onyń sózinshe, Rahat Sársenov 1994 jyldan beri bir qojalyqtyń jylqysyn baǵyp kelgen. Jyldar boiy mal sońynda júrip, aýyr eńbek etken ol insýlt alyp, aýrýhanaǵa túsken kezde ústinen aryz túsip, qamaýǵa alynǵan.
«Inimniń qan qysymy 250–280-nen túspeidi. Únemi em qabyldap jatyr. Ol ómiriniń 33 jylyn jylqy baǵýǵa arnady. Insýlt alǵannan keiin aýrýhanada jatqan kezinde ústinen aryz jazylyp, 100 bas jylqyny urlady degen aiyp taǵyldy. Saýaty joq bolǵandyqtan, nege qol qoiyp jatqanyn túsinbei, qoryqqanynan qujattarǵa qol qoiǵan. Sonyń saldarynan 2 ai 20 kún qamaýda otyrdy. Tipti úiin bankke kepilge qoiǵanyn da keiin bildik. Qazir ózi kiine de almaidy, sóileýi anyq emes. Soǵan qaramastan aramyzǵa aman oralǵanyna qýanyshtymyz», – dedi Altynai Sársenova.
Sot barysynda Rahat Sársenovtiń ózi eshqandai málimdeme jasai almady. Onyń jubaiy da II toptaǵy múgedek ekeni aityldy. Bes balanyń anasy joldasynyń jazyqsyz jaza arqalaǵanyn aityp, ádildiktiń saltanat qurǵanyna qýanyshty ekenin jetkizdi.
