اقتٶبە وبلىستىق سوتى 60 جاستاعى جىلقىشى راحات سەرسەنوۆكە قاتىستى شىعارىلعان ٷكٸمدٸ قايتا قاراپ, ونى سوت زالىنان بوساتتى, دەپ حابارلايدى ult.kz.
بۇعان دەيٸن ول قوجالىق يەسٸنٸڭ ارىزىنان كەيٸن 100 جىلقىنى جىمقىردى دەگەن ايىپپەن 7 جىلعا باس بوستاندىعىنان ايىرىلىپ, موينىنا شامامەن 30 ميلليون تەڭگە شىعىن ٸلٸنگەن بولاتىن. الايدا اپەللياتسييالىق سوتتا ۇسىنىلعان قوسىمشا دەلەلدەر نەتيجەسٸندە بٸر عانا جىلقىنىڭ جوعالعانى انىقتالدى.
اپەللياتسييالىق سوت وتىرىسى ەموتسيياعا تولى ٶتتٸ. ٶمٸرٸنٸڭ 33 جىلىن جىلقى باعۋعا ارناعان راحات سەرسەنوۆ ٷكٸم ٶزگەرگەننەن كەيٸن سوت زالىنان بوستاندىققا شىقتى. دەنساۋلىعى سىر بەرگەن ازامات سوت بارىسىندا سٶيلەي الماي, كٶز جاسىنا ەرٸك بەردٸ. ونىڭ ينسۋلتتەن كەيٸن بٸر قولى مەن بٸر اياعى تولىق جۇمىس ٸستەمەي قالعان, سٶيلەۋٸ دە قيىنداعان.
مارقۇم ەمەس, كٶزٸ تٸرٸ باۋىرىنىڭ تاعدىرى ٷشٸن كٷرەسكەن ەپكەسٸ التىناي سەرسەنوۆا ونىڭ ٶمٸر بويى ادال ەڭبەك ەتكەنٸن ايتىپ, قوجالىق يەسٸنٸڭ ەرەكەتٸنە نارازىلىق بٸلدٸردٸ.
ونىڭ سٶزٸنشە, راحات سەرسەنوۆ 1994 جىلدان بەرٸ بٸر قوجالىقتىڭ جىلقىسىن باعىپ كەلگەن. جىلدار بويى مال سوڭىندا جٷرٸپ, اۋىر ەڭبەك ەتكەن ول ينسۋلت الىپ, اۋرۋحاناعا تٷسكەن كەزدە ٷستٸنەن ارىز تٷسٸپ, قاماۋعا الىنعان.
«ٸنٸمنٸڭ قان قىسىمى 250–280-نەن تٷسپەيدٸ. ٷنەمٸ ەم قابىلداپ جاتىر. ول ٶمٸرٸنٸڭ 33 جىلىن جىلقى باعۋعا ارنادى. ينسۋلت العاننان كەيٸن اۋرۋحانادا جاتقان كەزٸندە ٷستٸنەن ارىز جازىلىپ, 100 باس جىلقىنى ۇرلادى دەگەن ايىپ تاعىلدى. ساۋاتى جوق بولعاندىقتان, نەگە قول قويىپ جاتقانىن تٷسٸنبەي, قورىققانىنان قۇجاتتارعا قول قويعان. سونىڭ سالدارىنان 2 اي 20 كٷن قاماۋدا وتىردى. تٸپتٸ ٷيٸن بانككە كەپٸلگە قويعانىن دا كەيٸن بٸلدٸك. قازٸر ٶزٸ كيٸنە دە المايدى, سٶيلەۋٸ انىق ەمەس. سوعان قاراماستان ارامىزعا امان ورالعانىنا قۋانىشتىمىز», – دەدٸ التىناي سەرسەنوۆا.
سوت بارىسىندا راحات سەرسەنوۆتٸڭ ٶزٸ ەشقانداي مەلٸمدەمە جاساي المادى. ونىڭ جۇبايى دا ٸٸ توپتاعى مٷگەدەك ەكەنٸ ايتىلدى. بەس بالانىڭ اناسى جولداسىنىڭ جازىقسىز جازا ارقالاعانىن ايتىپ, ەدٸلدٸكتٸڭ سالتانات قۇرعانىنا قۋانىشتى ەكەنٸن جەتكٸزدٸ.
