Qyrǵyzstanda úsh jastaǵy eki bala ata-anasynyń Mercedes kóligin aidap ketip, jurtty tańǵaldyrdy, dep habarlaidy ult.kz.
Oqiǵa Osh oblysynda bolǵan. Balalardyń ata-anasy úiden ári balalarynyń, ári kóliktiń joǵalǵanyn baiqap, dereý izdeýge kirisken.
Belgili bolǵandai, kishkentai «júrgizýshiler» kólikpen biraz jer júrip ótip, jaqyn mańdaǵy jyraǵa jetkende toqtaǵan. Abyroi bolǵanda, balalar eshqandai jaraqat almaǵan. Alaida kólikke zaqym kelgen.
Kólik iesi ári videony jariialaǵan azamat bul oqiǵanyń ózine úlken sabaq bolǵanyn aitty. Onyń sózinshe, endi ol kóligin árdaiym qulyptap, kiltin balalardyń qoly jetpeitin jerde saqtaityn bolady.
Oqiǵa áleýmettik jeli qoldanýshylary arasynda qyzý talqylanyp jatyr. Kópshilik balalardyń aman qalǵanyna qýanyp, ata-analardy qaýipsizdik sharalaryn qatań saqtaýǵa shaqyrdy.
