15 sáýirde Qazaqstanda koronavirýs testi oń shyqqan taǵy 2656 adam anyqtalǵan. 71 adamǵa koronavirýs pnevmoniiasy diagnozy qoiylǵan. 28 adam ólimi tirkelgen: 27 adam – koronavirýstan, 1 adam koronavirýs pnevmoniiasynan qaitys boldy dep aitylady. Densaýlyq saqtaý ministrligi koronavirýs pnevmoniiasy men adam ólimi boiynsha eki kún burynǵy málimetti jariialap keledi.
Beisenbi kúni Almaty qalasynda 673 adamnan koronavirýs anyqtalǵan. Nur-Sultanda 601 naýqas tirkelgen. Shyǵys Qazaqstan oblysynda – 106, Pavlodar oblysynda – 43, Atyraý oblysynda – 117, Qaraǵandy oblysynda – 201, Aqmola oblysynda – 90, Batys Qazaqstan oblysynda – 112, Almaty oblysynda – 232, Qostanai oblysynda – 28, Soltústik Qazaqstan oblysynda – 42, Shymkent qalasynda – 119, Jambyl oblysynda – 40, Aqtóbe oblysynda – 120, Túrkistan oblysynda – 22, Mańǵystaý oblysynda – 35, Qyzylorda oblysynda 75 naýqas anyqtalǵan.
2020 jyldyń naýryz aiynan beri elde 281 351 adamnyń koronavirýs testi oń shyqqan. Sodan beri 3333 adam qaitys bolǵan. Bul statistikaǵa koronavirýs juqtyrǵany rastalǵan, biraq "ózge aýrýdan qaitys boldy" degen myńǵa jýyq adam ólimi enbegen.
Qazaqstan úkimeti byltyr tamyzdan beri virýs juqtyrǵany PTR testimen rastalmaǵan, biraq aýrý belgileri boiynsha koronavirýsqa uqsaityn pnevmoniia esebin júrgizip keledi. Sodan beri elde barlyǵy 51 695 adam pnevmoniianyń osy túrimen tirkelgen. Onyń 742-i qaitys bolǵan. Bul derek koronavirýstyń resmi statistikasynan bólek júrgiziledi. Biraq halyqaralyq uiymdar Qazaqstannyń bul eki deregin biriktirip kórsetip otyr.
Qazir 36 868 adam koronavirýstan emdelip jatyr. 36 myńnan astamynyń koronavirýs testi oń shyqqan. 616 adamnyń jaǵdaiy aýyr, 168 naýqastyń hali óte aýyr. 118 adam jasandy tynys apparatyna qosylǵan.
Qazaqstanda 1 aqpannan bastap halyqqa koronavirýsqa qarsy ekpe salyna bastaǵan. Vaktsina birinshi kezekte dárigerlerge salyndy. 16 sáýirdegi málimet boiynsha, elde 575 myń adam "Spýtnik V" ekpesiniń birinshi dozasyn alǵan. 112 myń adamǵa eki dozasy salynǵan. Koronavirýsqa qarsy ózge vaktsinalar sekildi "Spýtnik V" ekpesi de eki dozadan turady. Ekinshisi birinshisinen keiin 21 kún ótkende salynady.
