Qazaqstan jańa Salyq kodeksiniń nátijesinde 2025 jylǵa qarai qosymsha 4 trln teńge salyq jinaýdy josparlap otyr. Bul týraly búgin Global Challenges Summit 2018 forýmynyń ekinshi kúngi jalpy otyrysynda QR Premer-Ministri Baqytjan Saǵyntaev aitty, dep habarlaidy QazAqparat tilshisi.
«Búginde ekonomikalyq ósimniń jańa modeli, sapaly ekonomikalyq ósimge kóshý qajettigin túsinemiz. Ol ekonomikanyń indýstrialdy tehnologiialyq transformatsiiasynyń módeli retindegi tórtinshi ónerkásiptik revoliýtsiia ekendigi sózsiz. Al «Rýhani jańǵyrý» adam kapitalyn keshendi damytý baǵdarlamasyna kelsek, qoǵamdyq sanany jańǵyrtpai ekonomikany jańǵyrtý múmkin emes. Memleket basshysy usynǵan taǵy bir jańa strategiia qazaqstandyqtarǵa arnalǵan áleýmettik topta 5 áleýmettik bastama bar», - dedi Baqytjan Saǵyntaev.
Osy rette Premer-Ministr bul strategiialyq mindetterdiń qalai oryndalatyndyǵyna toqtaldy.
«Bul oraida úsh deńgeidi anyqtap alýǵa bolady. Birinshisi bizge qajetti júieli reforma bolmaq. Biz ol jaiynda aitqan kezde jekeshelendirý arqyly júrgiziletin ekonomikanyń qurylymdyq ózgeristerine basa nazar aýdaramyz. Qazirgi ýaqytta jekeshelendirýdiń ekinshi tolqyny aiasynda 800-den astam kompaniia satylymǵa shyǵaryldy. Protsess josparǵa sai júrgizilýde», - dedi ol.
Onyń atap ótýinshe, jekeshelendirýge shyǵarylǵan 65-top kompaniia barlyq investorlardyń qyzyǵýshylyǵyn týdyryp otyr. Onyń ishinde 9 ulttyq strategiialyq kompaniia IRO arqyly jekeshelendiriletin bolady. Aǵymdaǵy jyly «Eir Astana», «Qazatomónerkásip», «Qazaqtelekom» kompaniialary IRO-ǵa shyǵyrlady dep kútilýde.
Sonymen qatar ol Qazaqstanda qabyldanǵan jańa Salyq kodeksine de toqtaldy.
«Ótken jyly biz jańa Salyq kodeksin qabyldap, ol aǵymdaǵy jyldyń basynan qoldanysqa endi. Salyq reformasy investitsiialyq ósim kózderin izdeýge baǵyttalǵan. Atalǵan ózgeristerdiń aiaǵynda biz 2025 jylǵa qarai qosymsha 4 trln teńge salyq jinaýdy josparlap otyrmyz», - dedi Baqytjan Saǵyntaev.
