2025 jylǵa qarai 418 indýstriialyq joba iske asyrylady. Bul týraly Ortalyq kommýnikatsiialar qyzmetindegi baspasóz máslihatynda QR Ulttyq ekonomika ministri Áset Erǵaliev aitty, dep habarlaidy QazAqparat tilshisi.
Onyń atap ótýinshe, «Qazaqstandyqtardyń ál-aýqatyn arttyrýǵa baǵyttalǵan ornyqty ekonomikalyq ósý» ulttyq jobasy 5 baǵytty qamtidy. Bul - indýstriialyq-innovatsiialyq damý, munai-gaz-himiia jáne energetika keshenderin, geologiia salasyn damytý, sondai-aq shikizattyq emes eksportty ilgeriletý. Osy baǵyttardy iske asyrý aiasynda 6 mindet, 13 kórsetkish jáne 56 is-shara kózdelgen. Ulttyq jobany qarjylandyrýdyń jalpy kólemi 15,9 trln, onyń ishinde respýblikalyq biýdjetten 402 mlrd teńge qarastyrylǵan. 15,5 trln teńge jeke investitsiialar tartý kózdelip otyr. Ulttyq jobanyń «Indýstriialyq-innovatsiialyq damý» baǵyty aiasynda eki negizgi mindet aiqyndaldy: óńdeýshi ónerkásip kásiporyndaryn tehnologiialyq jańǵyrtý, sondai-aq óndiris kólemin ulǵaitý, sondai-aq óńdeý ónerkásibi taýarlarynyń nomenklatýrasyn keńeitý.
«Birinshi mindetti sheshý úshin kásiporyndardyń jańa tehnologiialardy satyp alýǵa jáne engizýge, jabdyqtardy montajdaýǵa jáne iske qosý-jóndeý jumystaryna, sondai-aq biliktilikti arttyrýǵa, tehnologiialyq jabdyqtardy satyp alýǵa jáne kredit berý, onyń ishinde lizing sharttaryn jaqsartýǵa jumsalǵan shyǵyndaryn óteýge baǵyttalǵan keshendi is-sharalardy iske asyrý kózdeledi», - dedi ol.
Onyń atap ótýinshe, 2025 jylǵa deiin óńdeýshi ónerkásiptegi tsifrlyq tehnologiialardy paidalanatyn kásiporyndardyń úlesin 7-den 23 paiyzǵa deiin arttyrý josparlanǵan.
«2025 jylǵa qarai 418 indýstriialyq joba iske asyrylyp, negizgi kapitalǵa 11 trln teńgeden asa investitsiia tartylady. Nátijesinde óńdeý ónerkásibi óndirisiniń kólemi 2020 jyldyń deńgeiine 1,5 esege artady», - dedi Áset Erǵaliev.
