Foto: Halyq Uni
Eńbek jáne halyqty áleýmettik qorǵaý ministrligi 2024 jyly Qazaqstanda zeinetaqy men járdemaqy qalai ósetinin aitty, - dep habarlaidy "Ult aqparat" vedomstvonyń baspasóz qyzmetine silteme jasap.
"2024-2026 jyldarǵa arnalǵan respýblikalyq biýdjet týraly zańda 2024 jylǵy 1 qańtardan bastap memlekettik járdemaqylar men bazalyq zeinetaqy tólemderiniń barlyq túrin QR Ulttyq Banki aiqyndaityn infliatsiianyń boljamdy deńgeiine sáikes 7%-ǵa, yntymaqty zeinetaqyny – 9%-ǵa, iaǵni infliatsiia deńgeiinen 2%-ǵa ilgerilep arttyrý kózdelgen.
2024 jyly biýdjetten tólenetin jiyntyq zeinetaqynyń ortasha mólsheri (BJZQ tólemderin eseptemegende) 130 414 teńgeni quraidy (2023 jyly – 120 838 teńge).
Budan basqa, Memleket basshysynyń tapsyrmasy boiynsha 2023 jyldan bastap bes jyl ishinde eń tómen bazalyq zeinetaqyny eń tómen kúnkóris deńgeiiniń 70%-na deiin, eń joǵary – 120%-ǵa deiin jyl saiyn kezeń-kezeńimen arttyrý júzege asyrylady" - delingen habarlamada.
Máselen, 2024 jylǵy 1 qańtardan bastap bazalyq zeinetaqynyń eń tómen mólsheri eń tómen kúnkóris deńgeiinen 60%-dan 65%-ǵa deiin ulǵaitylatyn bolady, bul 28 215 teńgeni quraidy, al eń joǵary mólsheri eń tómen kúnkóris deńgeiinen 100-den 105 %-ǵa deiin arttyrylyp, 45 578 teńgeni quraidy.
2024 jylǵy 1 qańtardan bastap memlekettik járdemaqylardyń ulǵaiýynyń birneshe mysaly:
- 1, 2, 3 balanyń týýyna beriletin járdemaqy 131 100 teńgeden 140 296 teńgege deiin, 4 jáne odan da kóp bala týýyna beriletin járdemaqy – 217 350 teńgeden 232 596 teńgege deiin ulǵaiady;
- mólsheri balalar sanyna bailanysty kópbalaly otbasylarǵa beriletin járdemaqy 4 balasy bar otbasylar úshin 55 304 teńgeden 59 183 teńgege deiin, 10 balasy bar otbasylar úshin – 138 000 teńgeden 147 680 teńgege deiin ulǵaiady;
- I top múgedektigi bar adamdarǵa arnalǵan járdemaqy 89 248 teńgeden 95 496 teńgege deiin, II top – 71 398 teńgeden 76 397 teńgege deiin, III top – 48 681 teńgeden 52 089 teńgege deiin ulǵaitylady.
"Sondai-aq, Memlekettik áleýmettik saqtandyrý qorynan (budan ári – MÁSQ) asyraýshysynan aiyrylý jáne eńbekke qabilettiliginen aiyrylý boiynsha tólemder 7%-ǵa ulǵaitylady. Atalǵan tólemder mindetti áleýmettik saqtandyrý júiesine qatysýshylarǵa biýdjetten beriletin memlekettik járdemaqylarǵa qosymsha júzege asyrady.
Tólemderdiń mólsheri jeke-jeke jáne mynalarǵa bailanysty bolady: sońǵy 2 jylda MÁSQ-ǵa áleýmettik aýdarymdar júrgizilgen ortasha ailyq tabys, eńbekke qabilettiliginen aiyrylý koeffitsientteri, asyraýyndaǵy adamdar sany, mindetti áleýmettik saqtandyrý júiesine qatysý ótili jáne tabysty almastyrý" - delingen habarlamada.
