Foto: ©️ Tengrinews.kz / Turar Qazanǵapov
Biryńǵai jinaqtaýshy zeinetaqy qory 2024 jylǵa arnalǵan zeinetaqy jinaqtarynyń eń tómengi jetkiliktilik shegi 2023 jylǵy deńgeiinde qalǵanyn málim etti, dep habarlaidy "Ult aqparat".
Bul mán BJZQ salymshysy zeinetaqy jinaǵynan qansha qarajatty merziminen buryn ala alatynyn anyqtaý úshin qajet.
Jetkiliktilik shegi jas erekshelikterine qarai 3-ten 10 million teńgege deiin bolady.
"Eń tómengi jetkiliktilik sheginiń mólsherin burynǵy deńgeide saqtaý ishinara kiristiń boljamdy jyldyq paiyzdyq mólsherlemesiniń joǵarylaýymen de bailanysty. Osylaisha, bekitilgen áleýmettik-ekonomikalyq kórsetkishter men boljamdy esepteýlerdi eskere otyryp, 2024 jylǵa arnalǵan eń tómengi jetkiliktilik sheginiń mólsheri burynǵy deńgeide saqtalady", - delingen qor habarlamasynda.
2024 jylǵa arnalǵan áleýmettik-ekonomikalyq kórsetkishter:
1. eń tómengi jalaqy mólsheri - 85 000 teńge;
2. memlekettik bazalyq zeinetaqy tóleminiń eń tómengi mólsheri - 28 215 teńge;
3. zeinetaqynyń eń tómengi mólsheri - 57 853 teńge;
4. bazalyq áleýmettik tólemderdiń mólsherin esepteý úshin eń tómengi kúnkóris deńgeiiniń shamasy – 43 407 teńge.
Esterińizge sala keteiik, TJSh – bul ai saiynǵy zeinetaqynyń mólsherin eń tómengi zeinetaqy mólsherinen kem emes deńgeide qamtamasyz etýge qajetti zeinetaqy jinaqtarynyń (mindetti zeinetaqy jarnalary esebinen qalyptastyrylǵan) eń tómengi mólsheri. Bul áleýmettik-ekonomikalyq kórsetkishterge, sondai-aq bolashaq zeinetaqy jarnalarynyń boljamdy esepteýlerine (eń tómengi jalaqy mólsherinen) jáne investitsiialyq tabystylyqqa súiene otyryp anyqtalatyn zeinetaqy jinaqtarynyń baǵalaý somasy. Basqasha aitqanda, eń tómengi jetkiliktilik shegi – bul salymshynyń zeinet jasyna jetkende eń tómengi zeinetaqy mólsherinen kem emes zeinetaqy tólemderin (eń tómengi bazalyq zeinetaqy tólemin eskere otyryp) alýy úshin shotta qalýǵa tiis eń tómengi kórsetkish.
video: BJZQ baspasóz qyzmeti
