QR Qarjy ministrligi memlekettik kirister komiteti 2020 jyly biýdjetke salyqtardy qolma-qol aqshasyz tóleý deńgeiin 90 paiyzǵa jetkizýdi kózdep otyr, dep habarlaidy QazAqparat.
«QR Qarjy ministrligi «Búgingi tańda memlekettik kirister organdary kórsetiletin qyzmetterdi tsifrlandyrýdyń, keiingi jyldary biýdjetke qolma-qol aqshasyz tólem jasaýdyń yńǵaily jáne qarapaiym servisterin júzege asyrý úshin is-sharalar júrgizýde. 2019 jyldyń qorytyndysy boiynsha biýdjetke qolma-qol aqshasyz tólemderdiń úlesi 80 paiyzdy qurady. 2020 jyly salyqtardy qolma-qol aqshasyz tóleý deńgeiin 90 paiyzǵa deiin arttyrý josparlanýda. Osy kórsetkishke qol jetkizý úshin memlekettik kirister komiteti biýdjetke salyq tóleýdiń yńǵaily jáne qarapaiym qyzmetterin iske qosty», - deidi OKQ-da ótken baspasóz máslihatynda memlekettik kirister komiteti tóraǵasynyń orynbasary Talǵat Mamaev.
Onyń aitýynsha, bul servister - salyqtar men áleýmettik tólemderdi tóleý, bereshek somasy, aldaǵy tólemder jáne salyq ámiiany. Olardy ártúrli internet alańdarda paidalanýǵa bolady.
«2018 jyldyń shilde aiynan bastap salyq tóleýshiler salyq mólsherin memlekettik kirister komitetiniń mobildi qosymshasy men ekinshi deńgeili bankterdiń mobildi qosymshalary, elektrondy úkimet portalynda baqylap, tólei alady. 2019 jyldyń qyrkúieginen bastap bul portaldar men atalǵan mobildi qosymshalarda jeke tulǵalar múlik, jer ýchaskesi, kólik quraldary, jeke tabys boiynsha aldaǵy salyqtardy tóleý múmkindigine ie boldy. Ekinshi deńgeili bankterdiń mobildi qosymshalary arqyly tólengen salyq týraly málimet memlekettik kirister komitetiniń aqparattyq júiesine 2 minýttyń ishinde kelip túsedi. Buryn bul aqparat 2-3 kúnde bir-aq túsetin. Ýaqytty osyndai qysqa merzimge qysqartý arqyly taýar shyǵarý úshin qajetti burynǵydai qujattardy talap etpeýge, biýdjettegi shottyń jaiy týraly mańyzdy málimetterdi usynýǵa, ósimaqy salmaýǵa, shottardy buǵattan tez bosatýǵa múmkindik berdi», - dedi ol.
