Aýyl sharýashylyǵy ministri Saparhan Omarov Qazaqstannyń agroónerkásip keshenin damytý máseleleri jónindegi Qoǵamdyq keńestiń kezekti otyrysynda ministrliktiń 2020 jyly atqarǵan jumysynyń nátijeleri týraly esep berdi, dep habarlaidy "Ult aqparat".
Agroónerkásip keshenin damytý nátijelerin kórsetken ministr koronavirýs pandemiiasyna jáne álemdegi kúrdeli ekonomikalyq jaǵdaiǵa qaramastan, 2020 jyldyń qorytyndysy boiynsha sala barlyq makrokórsetkishter boiynsha ósimge qol jetkizgenin aitty. Máselen, aýyl sharýashylyǵynyń jalpy óniminiń kólemi 5,6%-ǵa artyp, 6,3 trln teńgege jetken.
Mundai ósimge memlekettik agrarlyq saiasat indikatorlarynyń josparly túrde oryndalýy, sondai-aq júieli jumys pen ótken jyldyń kókteminde daǵdarysqa qarsy shuǵyl sheshimderdiń der kezinde qabyldanǵany yqpal etti.
«Ótken jyly daǵdarysqa qarsy sharalardy eseptegende, memlekettik qoldaý kólemi 366 mlrd teńgege deiin jetti. Bul 2019 jylǵy deńgeiden 13%-ǵa artyq.
Atap aitqanda, sýbsidiialaý barynsha jeńildetilip, tolyq avtomattandyryldy. Onyń belgili bir salaǵa ǵana nazar aýdarmai, biryńǵai tásildi kózdeitin mehanizmderi qaita qaraldy. Sondai-aq shaǵyn jáne orta fermerlerdi sýbsidiialaýǵa qol jetkizý shegi ózgertildi», - dedi ministr.
Onyń aitýynsha, ósimdik sharýashylyǵyndaǵy barlyq sýbsidiialar Biryńǵai erejelerge biriktirilip, ósimdikterdi qorǵaý quraldaryn sýbsidiialaý keńeitildi. Endi gerbitsidter ǵana emes, pestitsidterdiń basqa da túrleri sýbsidiialanady. Basty jańalyqtardyń biri – sýbsidiialardy bekitilgen ýaqytta ǵana emes, tuqymdy, tyńaitqyshty, pestitsidterdi satyp alynǵan kúnnen bastap jyl on eki ai ala alatyn múmkindik berilip otyr.
Qarjy quraldaryn jetildirý aiasynda ainalym qarajatyn tolyqtyrýǵa arnalǵan nesieler boiynsha syiaqy mólsherlemelerin sýbsidiialaý normativi 5%-dan 7%-ǵa deiin ulǵaityldy. Endi egin egý jáne egin jinaý jumystaryn júrgizý syiaqy mólsherlemesiniń 9%-y sýbsidiialanady.
«Agroónerkásip kesheniniń sýbektileri úshin kepildik bazasy jetpegen jaǵdaida ekinshi deńgeidegi bankterdiń nesielerine kepildik berý mehanizmi qoljetimdi boldy. Nesie somasynyń 50%-na deiin jáne basym investitsiialyq jobalar boiynsha nesie somasynyń 85%-na deiin kepildik beriledi.
Ótken jyldan bastap aýyl sharýashylyǵy salasynda saqtandyrýdyń jańa júiesi jumys istei bastady. Iaǵni, saqtandyrý erikti túrde jasalady. Sondai-aq ósimdik sharýashylyǵy salasyn ǵana emes, basqa da salalardy saqtandyrý mehanizmi engizildi», - dep habarlady Saparhan Omarov.
Otyrys sońynda Qoǵamdyq keńes músheleri uiymdastyrý máselelerin qarady. Atap aitqanda, tóralqa quramyn, erejeni jáne jyldyq jumys josparyn bekitti.
