Quqyqtyq statistika jáne arnaiy esepke alý komitetiniń ortalyqtandyrylǵan derekter bankiniń málimetterine sáikes 2020 jyly shamamen 7 mln ákimshilik quqyq buzýshylyq tirkeldi, dep habarlaidy "Ult aqparat".
«El boiynsha 5,5 mln quqyq buzýshyǵa 80 mlrd 499 mln teńge kóleminde aiyppul túrinde jaza qoldanyldy, onyń 54 mlrd 886 mln teńgesi óndirilip alyndy. Sonymen qatar, 3,4 mln aiyppuldyń kóp bóligi alǵashqy 7 táýlik ishinde 30,2 mlrd teńge somasynda 50% jeńildikpen tólendi. Ótken jyly ákimshilik aiyppuldardy óndirip alý kórsetkishi 68 paiyzdy qurady», - delingen atalǵan komitettiń málimetinde.
Eń kóp aiyppul Almaty qalasynda salynǵan. 16,4 mlrd teńge somasyna 1,6 mln quqyq buzýshylyq anyqtaldy, onyń 10,6 mlrd teńgesi tólendi.
Ekinshi orynda – Nur-Sultan qalasy. 1 mln quqyq buzýshyǵa 13,5 mlrd teńge aiyppul salynyp, 9 mlrd teńge óndirildi.
Eń azy Soltústik Qazaqstan oblysynda, iaǵni 1,4 mlrd teńge somasyna 73 myń aiyppul salyndy, onyń 891 mln teńgesi tólendi.
Memlekettik organdar arasynda quqyq buzýshylyqtardyń eń kóp sanyn ishki ister organdary anyqtady, olarǵa barlyq ákimshilik isterdiń 90 paiyzdan astamy tiesili.
«Ishki ister organdary jalpy 52 mlrd teńge somasyna 5,3 mln quqyq buzýshyny jaýapkershilikke tartty, onyń ishinde memleket biýdjetine 35,2 mlrd teńge tústi. Aiyppuldardyń negizgi bóligin foto-beinetirkeý kameralary tirkegen quqyq buzýshylyqtar qurady, olar boiynsha 26,8 mlrd teńge somasyna 3 mln-nan astam sheshim shyǵaryldy», - delingen habarlamada.
