Ótken jyldyń 12 aiynyń qorytyndysynda 11,53 mln tonna munai ónimderi óńdeldi. Bul týraly Úkimet otyrysynda QR Energetika ministri Nurlan Noǵaev aitty, dep habarlaidy QazAqparat.
«Ótken jyldyń 12 aiynyń qorytyndysynda 11,53 mln tonna munai ónimderi óńdeldi. Avtobenzin boiynsha kórsetkish 4,48 mln tonnaǵa jetti. Iaǵni ótken jyldyń jospary 102,6 paiyzǵa oryndaldy. Óndirilgen dizel otynynyń kólemi 4,55 mln tonna boldy. Bul esepti jyldyń josparynyń 102,2 paiyzyna teń», - dedi ol.
Onyń aitýynsha, ótken jyly mazýt óndirý 108,2 paiyzǵa artyp, 2,1 mln tonnany qurady. Al áýe otyny boiynsha kórsetkish 438 myń tonna boldy. Iaǵni jospar tek 93,4 paiyzǵa oryndaldy. Oǵan áýe qatynasynyń azaiýy sebep bolyp otyr.
«Bitým óndirý 2020 jyldyń qorytyndysy boiynsha 1,04 mln tonnaǵa jetti. Iaǵni esepti jyldyń jospary 105,4 paiyzǵa oryndaldy. 2021 jyldyń bitýmge jospary qazirgi tańda Avtomobil joldary komitetimen pysyqtalýda. Búgingi tańda ishki naryq elimizde óndirilgen munai ónimderimen tolyq qamtamasyz etilgen. Munai-gaz-himiia ónimderine toqtalatyn bolsaq, onyń kólemi 359,3 myń tonnaǵa jetti. Bul ótken jyldyń 12 aiynyń josparynan asyp túsip, 103 paiyzdy qurady», - dedi Nurlan Noǵaev.
Sonymen qatar ministr esepti kezeńde 108 mlrd kVt saǵat elektr energiiasy, 19,5 myń tonna ýran óndirilgenin atap ótti.
