Foto: Polisia.kz
Taldyqorǵanda jolaýshy taksi júrgizýshisiniń kóligin zańsyz iemdengen, – dep habarlaidy "Ult aqparat" Polisia.kz portalyna silteme jasap.
Politseiler jolaýshy retinde qalanyń shaǵyn aýdandarynyń birine barǵan jas qyz urlap áketken sheteldik kólikti iesine qaitarǵan.
"Demalys kúnderi Taldyqorǵan politseileri urlanǵan Hyundai Accent kóligin izdeýge kómek suraǵan jergilikti turǵynnyń ótinishin tirkedi. Ótinish berýshi kólikti belgisiz qyz urlap ketkenin, ony oblys ortalyǵynyń shaǵyn aýdandarynyń birine aparǵanyn túsindirdi" - delingen habarlamada.
Belgili bolǵandai, jolda kele jatqanda klient júrgizýshiden mineraldy sý satyp alýdy ótingen, keiin júrgizýshiniń joqtyǵyn paidalanyp, kólikti aidap áketken. Jedel-izdestirý is-sharalary barysynda politseiler jábirlenýshiniń sheteldik kóligin Almatydaǵy oiyn-saýyq oryndarynyń birinen tapqan.
"Avtokólik zańdy iesine qaitaryldy. Kúdikti tulǵa retinde 19 jastaǵy qyzdy ustadyq. Qazir is júzinde QR QK-niń 200-babynda (Urlaý maqsatynsyz avtokólikti nemese ózge de kólik quralyn zańsyz iemdený) kózdelgen qylmystyq is qozǵaldy. Ustalǵan adamnyń jeke basyn rastaityn qujattary bolmaǵanyn eskere otyryp, ol ýaqytsha qabyldaý-taratý ornyna jetkizildi", – dedi Taldyqorǵan QPB bastyǵynyń orynbasary Qairat Baimuhanov.
Jyl basynan beri aimaqta 37 avtokólik urlaý faktisi tirkelgen. Barlyq kólik tabylyp, ielerine qaitarylǵan.
