Qazaqstanda esirtki óndirip, taratqan uiymdasqan qylmystyq toptyń múshesi Reseiden ekstraditsiialandy. Kúdiktiler zańsyz jolmen tapqan 1,8 mlrd teńgeden astam qarajatty kriptoaiyrbastaý servisteri arqyly zańdastyrǵan, dep habarlaidy ult.kz.
Bas prokýratýranyń málimetinshe, Qazaqstan azamaty Temirtaý qalasynda asa iri mólsherde psihotroptyq zattar óndirýdi uiymdastyrǵan qylmystyq toptyń quramynda bolǵan. Daiyn ónimder Qaraǵandy oblysynda taratylǵan.
Tergeý barysynda qylmystyq jolmen alynǵan qarajatty zańdastyrý úshin túrli qarjylyq operatsiialar júrgizilgeni anyqtalǵan. Onyń ishinde kriptoaiyrbastaý servisteri arqyly 1,8 mlrd teńgeden astam aqsha zańdastyrylǵan.
Sonymen qatar kúdiktiler 600 mln teńgeden astam qarajatqa jyljymaityn múlik, biznes nysandary men kólik satyp alǵan. Bul aktivterdi memleket kirisine ainaldyrý maqsatynda olarǵa tyiym salynǵan.
Qylmystyq top múshelerinen 10 kelige jýyq mefedron tárkilengen. Qazir toptyń keibir múshelerine qatysty qylmystyq is sotta qaralyp jatyr.
Quqyq qorǵaý organdarynan jasyrynǵan qylmystyq top músheleri, onyń ishinde ekstraditsiialanǵan kúdikti de halyqaralyq izdeýge jariialanǵan.
Kúdikti 2025 jyldyń qazan aiynda Reseide ustalǵan. Qazaqstan Bas prokýratýrasynyń suraýy boiynsha ol elge ekstraditsiialanyp, qazir tergeý izoliatoryna qamaldy.
Oǵan taǵylǵan qylmystar boiynsha múlkin tárkilei otyryp, 20 jylǵa deiin bas bostandyǵynan aiyrý jazasy qarastyrylǵan.
Buǵan deiin osy qylmystyq toptyń taǵy bir belsendi múshesi Grýziiadan Qazaqstanǵa ekstraditsiialanǵan.
