Nege qazaqtar Qazaqstannan ketip jatyr? Ketip jatqandardyń bári jemqor iaki paraqor emes qoi. Olardyń úlesi 10% ǵana. Al qalǵan 90%-y jastar. Iá, 25-35 jas aralyǵyndaǵy qylshyldap turǵan jastar. Memleketti tóńkerip te, kóterip te tastai alatyn jastaǵy jandar.
Energiiasy men bolashaqqa degen jospary toly, erteńgi kúnge kúlip qaraityn jandar. Qazir ózimmen jasty qyzdarmen, uldarmen bas qosa qalsaq boldy, ekiniń biri shetelge ketkisi keletinin aitady. Olar úshin basty kedergi aǵylshyn tilin jetik bilmeýinde bolyp otyr. Al erte me, kesh pe ol qorshaýdyń da joiylary anyq. Tipti mektepte "Mai neim izdi" aita almaityn kei tanystarym, shetelge taban jaltyratý úshin, búginde aq ter, kók ter bolyp júzdegen myń teńgesin shashyp, til kýrsyn oqyp jatyr. Ketkisi keletinderdiń kóbisi oqýǵa barǵysy keletinin, yńǵaiy kelse sonda qalatynyn aitsa, endi bir bóligi birjolata shetelge qonys aýdarǵysy keledi. "Sonda qonys aýdarsaq bári jaqsy bolady" degen úmitte. Olardyń ishinde osydan bes jyl buryn Qazaqstan úshin júregin julyp berýge daiyn ekendigin aitqan jáne shyndyǵynda sondai sezimde bolǵan jigitter men qyzdar bar. Olardyń ólsheýsiz, sheksiz osynaý patriottyq sezimin keri baǵytta tóńkeirip tastaǵan ne bolýy múmkin? Árine jemqorlyq, qoǵamdyq áleýmettik teńsizdik, erteńgi kúnge degen senimsizdik. Ketip jatqandardyń kóbisi óte bilimdi jandar. Qazaqstanda týra toqsanynshy jyldardaǵydai "aqyldylar aǵyny" (ýtechka mozgov) bolyp jatqan syndy.
"Qiyn-qystaý sátte de óz jerimizde bolǵanbyz", "qara sý iship, qara nan jesek te óz elimizde qalýǵa tiispiz" degen qurǵaq sóz, uran endigi tańda olardy ustap qala almaidy. Olardy osynda qalýǵa itermeleitin ekonomikalyq, ádiletti reformalar jasalýǵa tiis. Ol reformalar ár jastyń júreginde erteńgi kúnge degen senim otyn jaǵýǵa mindetti.
Al ázirge 179 myń dollarǵa bireý tort satyp alyp, endi bireý 30 myń ailyq alyp jatqan sátte ketý toqtamaidy. Óitkeni olar qoǵamdaǵy teńsizdikti anyq kórip otyr. Al búgingidei daraqylyq ony tipti aishyqtai túsýde.
Ashat Qasenǵalidiń feisbýktegi jazbasynan
