Foto: freepik
Almatyda kólik satyp almaq bolǵan erli-zaiypty alaiaqtyqtyń qurbanyna ainalyp, 17 million teńgesinen aiyryldy. Olar "Sanzhar Rulit" avtosalonynan gibridti kólik almaq bolǵanymen, aqyry kóliksiz qalǵan. Bul týraly Kozachkov offside Telegram arnasynda habarlandy.
Oqiǵa ótken jyldyń qazan aiynda bolǵan. Erli-zaiypty avtosalonǵa baryp, kólik tańdaǵan. Málimetterge sáikes, salon iesi Abdallah-Sanjar Asqarov olarmen jeke sóilesip, 500 myń teńge jeńildik usynǵan. Keiin qujattardy rásimdeý satý menedjeri Nazerke Qarabekovaǵa tapsyrylǵan.
Tergeý derekterine qaraǵanda, menedjer satyp alý-satý kelisimshartyn daiyndap, klientterden aqshany kompaniianyń resmi shotyna emes, óziniń tanysynyń esepshotyna aýdarýdy talap etken. Alǵashynda 7,5 million teńge, keiin 7,4 million jáne taǵy 2 million teńge suratqan. Nátijesinde erli-zaiypty "Deepal" markaly avtokólik úshin jalpy 16 million 900 myń teńge aýdarǵan.
Menedjer kólikti 2025 jyldyń sońyna deiin jetkizip beremin dep ýáde etken. Alaida kólik satyp alýshylarǵa berilmegen. Biraz ýaqyt ótken soń erli-zaiypty aldanǵandaryn túsinip, aqshalaryn qaitarýdy talap etken. Osy kezde kelisimsharttaǵy qoltańbanyń jalǵan, al mórdiń túpnusqa emes ekeni belgili bolǵan.
Jábirlenýshiler politsiiaǵa júginip, is boiynsha qylmystyq is qozǵaldy. Sot barysynda Nazerke Qarabekova óz kinásin moiyndamai, aqshany úshinshi tulǵaǵa bergenin alǵa tartqan. Alaida bul sózderin rastaityn naqty dálelder men kýágerler tabylmady.
Nátijesinde Jetisý aýdandyq №2 soty 30 jastaǵy kúdiktini alaiaqtyq jasaǵany úshin kináli dep tanyp, 6 jylǵa bas bostandyǵynan aiyrý jazasyn taǵaiyndady. Úkim ázirge zańdy kúshine engen joq.
