QR Energetika ministri Bolat Aqsholaqov munai tasymaly boiynsha Kaspii qubyryna balama marshrýttardyń syiymdylyǵyn keńeitý múmkindikteri qarastyrylyp jatqanyn aitty, dep habarlaidy QazAqparat.
«Kaspii qubyr konsortsiýmyna keletin bolsaq, bul negizgi eksporttyq marshrýt. Negizgi jóndeý jumystary aiaqtaldy. Sońǵy eń shetki ailaq jospar boiynsha aidyń sońyna deiin jóndeledi. Negizinde, marshrýt shtattyq rejimde 100 paiyzǵa jumys istep tur deýge bolady. Bizde balama joldar bar. Biraq Kaspii qubyry siiaqty úlken kólemde emes. Óitkeni jylyna 54 million tonna munaidy tasymaldaityn balama joldy bir túnde tabý múmkin emes», - dedi vedomstvo basshysy Nur-Sultan turǵyndarymen kezesýinde.
Onyń sózine qaraǵanda, mundai kólemdi ornalastyrý úshin kem degende úsh jyl qajet.
«Tipti Qytaiǵa jetizetin balama joldyń qýaty 20 mln tonna ǵana. Múmkindikti keńeitemiz degen kúnniń ózinde Qytai sonsha kólemde munai alýǵa daiyn ba degen másele bar. Ol marshrýt boiynsha jalǵyz tutynýshy ǵana bar – Qytai. Olardan basqa eshkim tutyna almaidy.
Baký marshrýtyn balama retinde qalyptastyrý infraqurylym turǵysynan óte uzaq. Áýeli portty qalpyna keltirip, keiin kólemin ulǵaita bastaý kerek bolady. Ekinshi quryq portyn ornatyp, munai qubyryn tartý kerek. Tankerler tabý qajet. Kaspidiń tabany taiaz bolǵandyqtan onda kez kelgen tanker júze almaidy. Tek 12 myń tonnalyq tankerler ǵana júze alady», - dedi Bolat Aqsholaqov.
Sondai-aq, ol Baký tarapy Qazaqstan tasymaldaityn kólemdegi munaidy qabyldaýǵa daiyn bolmaýy múmkin ekenin eske saldy.
«Osynyń bárin eskersek bul másele óte kúrdeli. Biraq biz balama nusqalardy qoldanamyz. Búginde munaidyń bir bóligin osy balama joldarǵa jóneltip jatyrmyz. Bul 16,5 mln tonnadai bolady. Árine, ol 54 mln tonna emes. Biz basqa baǵyttar boiynsha júk tasymaldaimyz. Sondyqtan bul máseleni túbegeili sheshpeidi. Biraq biz basqa da tásilderin qarap jatyrmyz», - dedi ministr.
Sharadan keiin BAQ ókilderiniń saýalyna bergen jaýabynda Kaspii qubyryna balama jol tóseýdiń múmkindigi týraly túsinikteme berdi. Aitýynsha, Baký baǵyty birneshe jyldyń ishinde infraqurylym tóseýge bolady. Biraq ony rezervte ustap turýdyń shyǵyny orasan kóp bolýy múmkin.
«Qubyrǵa qyzmet etý shyǵyndary bolady. Mysaly qubyr tósep, basqa eldiń aýmaǵyna port salyndy deiik. Ol portty jaldaý aqysyn munai tasymaldasaq ta, tasymaldamasaq ta tódeý kerek bolady. Osyndai túrli shyǵyndar bar. Qazir sonyń bárin zerdelep jatyrmyz», - dedi vedomstvo basshysy.
