Qazaqstanda salafizm aǵymyna zań túrinde tiym salynýy múmkin. Mundai usynysty Elimizdiń Ulttyq qaýipsizdik komitetiniń tóraǵasy birneshe kún buryn usyndy, dep habarlaidy «Almaty arnasy».
Sońǵy jyldary Qazaqstanda bolǵan terrorlyq aktiler salafizm sekildi radikaldy toptardyń isi degen quzyrly organ basshysynyń pikirin dintanýshylar da quptaidy. Din isteri komitetiniń málimetinshe, búginde Qazaqstanda 15 myńdai adam salafizm ideiasyna ergen.
Esh dushpanǵa taptatpai, eshkimge soqtyqpai jai jatqan eldiń tynyshtyǵyn sońǵy bir jyldary «jaratqan úshin janymyz pida» dep urandaǵan jat aǵymnyń ókilderi buza bastady. «Bul salafizm. Bul aǵymǵa tiym salý qajet» degendi Ulttyq qaýipsizdik komitetiniń tóraǵasy birer kún buryn ózi málimdedi.
«Bul suraq qolǵa alyndy, ony jaqtap otyrǵandar da, qoldamai otyrǵandar da bar. Ideologiiaǵa tyiym salý qiyn. Degenmen 2011 jyldan beri bolǵan oqiǵalardyń barlyǵy salafittermen bailanysty boldy. Sondyqtan bul másele eń joǵary deńgeide Memleket basshysy men Qaýipsizdik keńesiniń deńgeiinde qaralady dep oilaimyn», - dedi QR Ulttyq Qaýipsizdik komitetiniń basshysy Vladimir JUMAQANOV.
Keshe ǵana Parlamenttiń birlesken otyrysyna qatysqan Prezident depýttarǵa arnaiy zańdyq kúshin qataitatyn qujat ázirleýdi tabystady. Óitkeni, dini ekstremizm men terrorizmniń tamyryna balta shabý negizgi mindet. Salafizm aǵymyna shekteý qoiýdy teolog mamandar da qup kóredi.
«Bul 2011 jylyda ózektiligin kórsetken bolatyn. Zań turǵyda tyiym salý durys dep esepteimiz, kerek te. Salafizmniń nemese ýahavizm qazaq halqynyń bolashaǵyna, keleshegine eshqandai tigizer paidasy joq. Bul baǵytty ustanatyn adam qazaq halqynyń ulttyq tanymyn salt-dástúrin eshqashan moiyndamaidy», - dedi QMDB mamany Baýyrjan ÁLIULY.
2011 jyldan beri elde bolǵan birneshe terrorlyq áreketterdiń barlyǵyn dintanýshylar da osy salafizmmen bailanystyrady. Sondyqtan qazirden bastap eldiń tynyshtyǵy men jat aǵymnyń jeteginde ketetin jetkinshekterge tosqaýyl bolatyn zań kerek dep sanaidy.
«Sońǵy jasalǵan Aqtóbedegi oqiǵalar Elbasymyzdyń ózi aitqandai salafittik áreketterdiń nátijesi. Eger qazir biz buǵan tyiym salmasaq, budan úlken kóretin bolamyz kelesi jyldyqta. Bul óziniń pisýine jetilip kele jatyr. Qazir belgili bir adamdar tarapynan jasalyp jatyr. Keiin úlken top bolyp aýyzdyqtai almai qalatyn dárejege jetýimiz múmkin. Sondyqtan qazir salý kerek tyiymdy», - dedi QMDB mamany Baýyrjan ÁLIULY.
Din mamandarynyń aitýynsha, salafizm baǵytyn ustanýshylar shynyna kelgende, memlekettiń negizgi zańnamalaryn, tipti ata zańyn da moiyndamaidy. Bul eldiń bolashaǵyna balta shaýyp, ishtei iritemiz degen arampiǵyldylardyń ustanymy, deidi. Búginde din týraly zańǵa ózgertýler engizilý úshin birqatar qujattar ázirlenip jatqan kórinedi.
«Maýsym aiynda Elbasynyń tóraǵalyǵymen Qaýipsizdik keńesi ótkizilgen bolatyn. Qaýipsizdik keńestiń otyrysynda naqty tapsyrmalar berildi ortalyq jáne jergilikti atqarýshy organdarǵa. Qaýipsizdik keńestegi Elbasynyń tapsyrmasy boiynsha dini ekstremizm jáne terrorizmmen kúresý jóninde zańnamalyq aktilerge qosymsha tolyqtyrýlar men ózgertýler engizý týraly tapsyrma berilgen. Qazir ortalyq memlekettik organdarda zańnamalyq aktiler ázirlenip jatyr», - dedi Almaty qalasy din isteri jónindegi basqarmanyń bólim basshysy Nurmuhammed MEIMANQOJA.
Elimizdiń din isteri jónindegi komitet málimetine sáikes, Qazaqstanda 15 myńdai salafizm baǵytyn ustanýshy bar. Aita keteiik, salafizm ideiasyna Ózbekstanda beiresmi túrde, Tájikstanda resmi túrde tyiym salynǵan.
