Tanymal akter Ábilmansur Serikovtiń burynǵy áieli Fariza Bekibai áleýmettik jelidegi paraqshasynda balalaryn qarjylai qamtamasyz etý máselesine qatysty pikir bildirdi, dep habarlaidy ult.kz.
Onyń sózinshe, eks-kúieýinen alimentti turaqty túrde alý qiyn. Keide birneshe ai boiy tólem jasalmaitynyn aitqan ol, balalarynyń kúndelikti shyǵyny men qajettilikteriniń basym bóligi óz moinynda ekenin jetkizdi.
«Aliment alý – qiynnyń qiyny. Birde bar, birde joq. Mine, tórt aidan beri almadyq. Ózi aýdarmasa, biz de suramaimyz. Balalardyń emi, dári-dármegi, sabaqqa kietin kiimi – barlyǵy meniń moinymda.
Balam myń teńge surasa da, “joq” deidi. Namystanyp, menen surama dep urysamyn. Keide menen tyǵylyp suraidy. Telefonynan kórip qoiamyn. Ekeýi de ózimmen erip kelgen balalar sekildi», – dep jazdy Fariza Bekibai.
Ol balalardyń ákesinen tek aliment emes, kúndelikti turmysqa qajetti dúnieler men em-domyna da qoldaý kórsetilýi mańyzdy ekenin atap ótti.
«Balalardy asyraý onyń da mindeti ǵoi. Myń teńge berip, bir qalam alyp bere almaityn ákeniń barynan joǵy dep oilaimyn. Basqa ýaqytta keremet kiinip júrgenshe, alimentin tólep, balalaryna kiim-keshek alyp, emine dári-dármek pen tamaǵyn áperse ǵoi.
Balalardy bir ret te qydyrtqan emes. Úlkenin tek osy jazda ǵana alyp ketti. Qalǵan ýaqytta biz qol jaimaimyz. Kúnimiz soǵan qarap qalmasyn. Alla ádil», – dedi ol.
Aita keteiik, akter Ábýnasyr Serikovtiń uly Ábilmansur Serikov ákesiniń óner jolynda ózin ne sebepti qoldamaǵanyn aityp, bala kezinde oǵan ne úshin renjigenin eske aldy.
Ábilmansur Serikov kim?
Ábilmansur Serikov – qazaq teatr jáne kino ónerinde ózindik qoltańbasy qalyptasqan akter. Ol Qazaqstan Respýblikasy Úkimetiniń «Daryn» memlekettik jastar syilyǵynyń laýreaty.
Akter 1991 jyly 7 jeltoqsanda Almaty qalasynda dúniege kelgen. Ónerge jaqyn otbasynda ósken Ábilmansurdyń ákesi – belgili akter, ázilkesh, «Nysana» teatrynyń jetekshisi Ábýnasyr Serikov. Anasy – aktrisa Liza Serikova.
Ábilmansur Serikov kásibi bilimin T. Júrgenov atyndaǵy Qazaq ulttyq óner akademiiasynyń teatr fakýltetinde alǵan. Ol atalǵan oqý ornyn 2013 jyly támamdaǵan.
Oqýynan keiin akter Ǵ. Músirepov atyndaǵy Qazaq memlekettik akademiialyq balalar men jasóspirimder teatrynyń, sondai-aq Q. Qýanyshbaev atyndaǵy memlekettik akademiialyq qazaq mýzykalyq drama teatrynyń sahnasynda óner kórsetti.
Kino salasynda da birqatar este qalarlyq obrazdardy somdaǵan akterdiń filmografiiasynda «5:32», «Dos-Muqasan», «Balalyq shaǵymnyń aspany», «Igrok», «Jibek», «Tańdaý», «Almaty, ia liýbliý tebia!» syndy filmder men serialdar bar.
Ásirese «5:32» serialyndaǵy Shalqardyń jas kezin beineleýi kórermenniń akterge degen qyzyǵýshylyǵyn arttyrdy. Al «Dos-Muqasan» filminde qazaq mýzykasynyń tarihynda ózindik orny bar tanymal toptyń ómiri men shyǵarmashylyǵyn arqaý etken týyndyda oinady.
Ábilmansur Serikovtiń shyǵarmashylyq jolyndaǵy aitýly rólderiniń biri – «Balalyq shaǵymnyń aspany» filmindegi mektep jasyndaǵy Nursultan Nazarbaevtyń, iaǵni Sultannyń beinesi.
Akterdiń eńbegi memlekettik deńgeide de baǵalanyp, 2020 jyly jastarǵa arnalǵan «Daryn» memlekettik jastar syilyǵyna ie boldy.
