QR Aqparat jáne qoǵamdyq damý ministri Dáýren Abaev «100 jańa esim» jobasynyń jańa talaptaryn aityp berdi, dep habarlaidy QazAqparat.
Nursultan Nazarbaev «Rýhani jańǵyrý» baǵdarlamalyq maqalasynda usynǵan bul joba biyl úshinshi ret uiymdastyrylyp otyr.
«Jobanyń úshinshi maýsymynda talaptar azdap ózgerdi. Birinshiden, jańa esimderdi izdeýge aldyńǵy maýsym jeńimpazdary atsalysady. Bul bastamany jeńimpazdardyń ózderi kóterdi, olar Biýro100 qozǵalysyn qurdy. Osylaisha, jańa jeńimpazdardy tabýǵa kómektesedi. Ekinshiden, jeńimpazdardy irikteitin quzyrly qazylar alqasy qurylady. Úshinshiden, kez kelgen adam jobaǵa ózin usyna alady. Buǵan deiin úmitkerdi ekinshi adamnyń usynýy mindetti bolǵan edi. Biyl bul shartty alyp tastadyq», - dep túsindirdi Dáýren Abaev «Habar» arnasyndaǵy «Ashyq dialog» baǵdarlamasynda.
Onyń aitýynsha, joba jeńimpazdary jeltoqsan aiynda el basshylyǵymen kezdesýge qatysady.
«Burynǵydai olardyń ómiri men tabysy týraly filmder túsiriledi. Burynǵydai oqýshylarmen jáne stýdenttermen kezdesý uiymdastyrylady, túrli jobalar jasalady. Jáne burynǵydai, otandastarymyzdyń el damýyna qandai orasan eńbek sińirip júrgenin kórsetemiz», - dedi ministr.
Eske sala ketsek, biylǵy 30 qyrkúiekte «Qazaqstannyń 2019 jylǵy 100 jańa esimi: jas qazaqstandyqtardyń tabys tarihy» jobasyna ótinimder qabyldaý bastaldy.
Jobaǵa qatysý úshin 100janaesim.ruh.kz saityndaǵy saýalnamany toltyrý qajet.
.jpeg)