IIM Qylmystyq-atqarý júiesi komitetiniń tóraǵasy Azamat Bazylbekov 10 jylǵa sottalǵan burynǵy Ulttyq ekonomika ministri Qýandyq Bishimbaev jazasyn qai túzeý mekemesinde óteitini týraly aitty, dep habarlaidy QazAqparat tilshisi.
«Astanadaǵy maksimaldy qaýipsizdiktegi birden-bir koloniia - 166/10 túzeý koloniiasy», - dedi Astanada qylmystyq-atqarý júiesi boiynsha ótken qoǵamdyq tyńdaýda jýrnalister suraǵyna jaýap bergen Bazylbekov.
Onyń aitýynsha, sottalǵan burynǵy ministrge eshqandai artyqshylyqtar berilmeidi.
«Biz buǵan deiingi sabaq bolǵandyqtan, sottalýshylarǵa qandai da bir artyqshylyqtardyń berilmeýin qatań túrde baqylaityn bolamyz. Ruqsat etiletin norma boiynsha - onyń ómir súrýine 3,5 sharshy metrden kem emes oryn, maýsymdyq kiim, úsh ýaqyt tamaq, meditsinalyq kómek beriledi. Mekeme baraq tiptes. Ol 50-60 orynǵa arnalǵan», - dedi ol.
Eske sala ketsek, 14 naýryz kúni Astana qalasy qylmystyq ister boiynsha mamandandyrylǵan aýdanaralyq sotynda burynǵy Ulttyq ekonomika ministri Qýandyq Bishimbaev pen osy iske qatysty ózge de sottalýshylarǵa sot úkimi shyqqan bolatyn. Úkim boiynsha Bishimbaev 10 jylǵa sottaldy.
