«Qazaqstanda órtengen ormandardyń aýmaǵy shamamen 10 Singapýrdyń nemese 3 Liýksembýrgtiń aýmaǵyna teń» dep málimdedi Parlament Májilisi depýtaty Rýslan Berdenov 12 aqpanda ótken Úkimet saǵatynda. Bul týraly "Ult aqparat" habarlaidy.
«Elimizdegi 30 mln gektarynan astam orman qorynda jylyna myńǵa jýyq órt shyǵý faktileri anyqtalady. Sońǵy 5 jylda 610 myń gektar orman janyp ketken. Salystyrmaly túrde janǵan aýmaq 10 Singapýrdyń nemese 3 Liýksembýrgtiń aýmaǵyna teń. Órttiń saldarynan kóz jumǵan azamattar, úi-kúiinen aiyrylǵan januialar, tiridei janyp ketken qyzylkitaptaǵy jabaiy ań men ósimdik resýrstary joiylýda. 5 jylda orman órti memleketke 30 mlrd teńge shyǵyn keltirdi", - dedi Rýslan Berdenov.
Depýtattyń aitýynsha, jiberilgen qatelikter az emes. Salaǵa kóńil bólip, naqty ózgerister men qatań qadaǵalaý qajettiligin byltyrǵy qaiǵyly Abai oblysyndaǵy 63,5 myń gektar, Qostanaidaǵy 40 myń gektar ormannyń órtenýi men jazyqsyz janyp ketken 14 adamnyń taǵdyry dálel.
"Jalpy halyqtyń Tótenshe jaǵdailar ministrliginiń jumysyna alańdatýshylyq bildiretinin eskerińizder. Almatydaǵy jer silkinisi kezinde sirenanyń qosylmaǵany, bailanys operatorlarynan habarlama kelmegeni, Seismologiia institýty jumysyna kóp suraq týyndaidy. Oǵan qandai kedergiler bar? Bul máseleni birlesip, salany qajetti deńgeige jetkizýge jumys isteýge shaqyramyn", - dedi depýtat.
Sondai-aq, depýtat Almaty qalasyndaǵy Taý-Samaly shaǵyn aýdanynda bolǵan jaǵdaiǵa nazar aýdardy.
"Oqiǵany erigen sý, jańbyr nemese jer asty sýlarynyń qanyǵýyna bailanysty topyraq qabatynyń tómen qarai jyljýy dep sipattady. Osyndai aimaqtarda barlaý nemese boljaý jumystary júrgiziledi me? Biz búgin máseleniń saldarymen kúresýdi ádetke ainaldyrdyq. Qaiǵyly oqiǵanyń aldyn alý úshin qaýipti aimaqtardy zerttep, boljaý jumystaryn júrgizý qajet dep sanaimyn", - dedi Rýslan Berdenov óz kezeginde.
